A dipaya suwala yaye

0
5110

HELVY SHAANIKA

Ongwediva- Omulumenhu womido 58, okuli moshipangelo shaNandjokwe eli moipandeko eshi a dipaya okamonagona kakaume kaye komoihole. Oshiningwanima eshi osha ningwa konguloshi yEtivali momukunda Ondobe-yoshaale momudingonoko wOnanghali.
Otaku hokololwa omulumenhu oo a hombola nokuna eumbo lili pomukunda Oshiya-shomatope pomudingonoko opo tuu opo, a dja poukamba oufiku nokuya keumbo oko haku di omukainhu eli naye moihole. Eshi a ya meumbo omo vati omukainhu ine mu hanga mo, nopondunda yomukainhu oo opali pa pata.
Okwa ya nee komutala wovamati, ta kondjifa ngeno a nangale kombete. Otaku hokololwa kamwe komoumati vavali ovo va li mondunda kedina Martina Tweadha Nampila (23) ka tameke oku tanguna, ina ka hala opo omulumenhu oo a nangale kombete yavo. Ava vavali ova tameka okulwa, nokamatyona oka denga omulumenhu oo nodibo momupolo.
Omulumenhu ou vati okwa kufa mo ombele noku twa Nampila nombele monhulo, kombinga yokolumosho. Nampila okwa xulifa konima ashike yokafimbo kashona eshi a tuwa.
Okamatyona ka kwao oko ka li ka nangala na Nampila vati oka faduka po no inaka dula oku tala kutya oshike naanaa sha ningwa po.
Omufekelwa oo eli omulumenhu omuNamibia nomukalimo womomukunda Oshiya-shomatope popepi nomukunda Ondombe-yoshaale, moshitukulwa shaShikoto edina lae ita li dulu okutumbulwa shaashi ina holoka natango momhangu.
Chief Inspector Edna Nawa oo eli omupopiliko wopolifi mOshikoto okwa koleka ouyelele ou, ta ti okwa teelelwa manga omufekelwa a lekelwe mo moshipangelo opo a holoke nawa komesho yomhangu. Mongaha okuli moshipangelo molwoivate oyo ili momupolo, ashike okuli momake opolifi. Omakonaakono opolifi moshinima omu onghee taa twikile.

LEAVE A REPLY

Please enter your comment!
Please enter your name here