Eendobwedi daJehovah da kanifa oshibofa

0
481

MARIA AMAKALI

Windhoek- Ongeleka yEendobwedi daJehovah (Jehovah’s Witness) mafiku otai tameke okufuta ovanailonga vayo ngaashi naanaa shi li mekotamhango lovanailonga, sha landula eshi ongeleka ei ya kana momhangu yakula oshivike eshi. Eshi osha ningwa konima eshi ovakwaneongalo vongeleka va twala oSocial Security Commission (SSC) komhangu shaashi oSSC ya anya okunyolifulula ongeleka oyo onga ongeshefa nomuyandji woilonga.

“Ongeleka ei otai kendabala okuyanda oshinakuwanifwa shayo osho shili koshi yokatendo koSSC, shaashi ina i hala okukala tai futu ovanashilonga shayo ngeenge tava ehama, ile ngee vaningi omateelelo ile ngeenge va fi,” osho omupanguli Petrus Unengu a ti.
Ongeleka ei omafiku aa oya ya koHigh Court, oko ya lombwela omhangu kutya yo kaishi omuyandji woilonga, nonghee ovalanduli vayo kave na oku talika ko onga ovanashilonga. Tai ti kapena okontalaka (eudafano lopailonga la shangwa) pokati kayo novalanduli, nonande ava ova Shaina okondalaka kutya vo otava kala ovakwanaluhepo novapiya vongeleka yEendobwedi daJehovah. Ashike oSSC oyati ongeleka oyo vene yeli shangifa onga ehangano, naasho kwa ningwa omakonaakono okwa monika kutya ovalanduli vayo ohava longo ngaashi naanaa ovanailonga, hava longo Omaandaxa fiyo Etitano, okudja po07h45 yongula fiyo opo16h45 komatango.

Keshe omulanduli oha kwata oshimaliwa shoN$940 keshe komwedi, nondjabi ei iha i likundwa. Omakonaakono okwa ulika yoo kutya ovalanduli ava ovena oku lekela omanga kuna omwedi, ngeenge ova tokola okuxulifa po eliyambo lavo, ngaashi naanaa hashi ningwa kovanailonga ovo va kutwa momahangano makwao moshilongo. Ongeleka yEendobwedi daJehovah oina oilyo 2,448 ya nyolifwa koitai ili 44 moshilongo ashishe. “Omhangu oya itavela kutya oSSC ili mondjila, nongeleka yEendobwedi daJehovah oina okuli ufa keemhango dovanailonga,” osho omupanguli a ti.

Okatendo kotete keevata dovanailonga otaka ti keshe ou ta longo okuna okufutwa. Ashike ongeleka oya otai ti ovalanduli vayo ovanhu ashike va anena okulongela Kalunga. Ongeleka inai dula oku nyamukula kutya omolwashike yeli shangifa koSSC onga omuyandji woilonga.
“Ongeleka ita i dulu okulongifa ehalo layo i hoolole kutya oveta ilipi po ta i dulu oku landula naa inaa i hala okulandula nongeleka itai mono omayakulo oshali shaashi ashike otai longele Kalunga,” osho Unengu a ti.

LEAVE A REPLY

Please enter your comment!
Please enter your name here