Esiku lyaCassinga kalishi esiku lyetyapulo

0
47

Sho oshigwana shaNamibia tashi dhimbulukwa esiku lyoosa oonene mondjokonona yoshilongo, oomvula 39 okuza esiku moka aantu yevule po600 ya sila mokamba yaCassinga, pamwe onawa tu ipule nokudhiladhila kutya oCassinga ano oshike, nesiku ndyoka olya gwana okudhimbulikiwa ngiini.
Mesiku 4 Mai 1978, omo mwa ningwa ondjokonona sho omuyalu gwaantu omunene mondjokonona yasi poshikando.
Ngiika ndika olyo lya ningi esiku moka oshikogo oshiluudhe moka aavalakadhi oyendji, noofamili dhawo ya kanitha iilyo yomazimo gawo poshikando shoka shali inaa shi ningwa nande onale moNamibia ngiika nomoAngola moka mwa li okamba yaCassinga.
Pamambo nonande nago oga yelitha kutya omuyalu nguka kagu shi gothaathaa, otaku tengenekwa kutya aanona 300, aakiintu 294 naalumentu 165 oya si sho okamba moka mwali unene hamu thikile aantu mba opo ya zi koNamibia okuya muupongekwa ya dhengwa komutondi, ano komatanga gopakwiita gaSouth Africa. Naanaa ngaashi omuyalu tagu shi ulike oyendji yomwaamboka yali mokamba moka oyali aakiintu naanona, ano aantu mboka ita ya vulu okwiigamena.
Oomvula 39 okuza esiku sho oshinima shika shaningwa, kakele kooluhupe lwaCassinga, naantu oohandimwe, aaNamibia oyendji ina ya tala ko we oshinima shika onga oshinima tashi nikitha oluhodhi, ihe oye wete kutya ndika olyo esiku yeli pewa omagano opo ya kale taya tyapula noku i uvitha nawa, taya nu omakende yo taya ningi iituthi yomayotho goonyama ano oobraai.
To adha nokuli omuntu a nwa ndele nedhina lye okweli dhimbwa, nondjila yokuya kegumbo ke yi shi shaashi anuwa ota tjapula esiku lyaCassinga.
Ashike shoka oshigwana shi na okudhimbulukwa ooshino kutya, ndika olyo esiku ndyoka lya etele aaNamibia mboka yeli momwenyo (ooluhupe) oondjodhi oombwinayi ano ihaaya kotha we taya mbonyoka oshoka oshinima shika oshe ya thigile ethano ewinaya itaaye li dhimbwa we moonkalomwenyo dhawo. Na unene, ndika olyo esiku moka aaNamibia oyendji ya kanitha oomweyo dhawo omolwa ekondjelomanguluko, opo tse nangoye tukale twa manguluka, tatu ende ethimbo twa hala, tatu ningi oongeshefa, tatu tungile mpo twa hala nonta tu lelwa kaaleli tweya hogolola tse yene.
Molwa oomwenyo dhooyakwetu mboka ya ningi omafikiloyambo opo tse tu manguluke, otwa pumbwa oku kala tatu dhimbulukwa esiku ndika nesimaneko, nomuukwao wanankali nooluhupe mboka oonkalomwenyo dhawo dha lunduluka okuza esiku ndyoka.
Oshinima oshikwao, aaNamibia oye li po ya ninga esiku lyaCassinga onga esiku lyopapolitika, moka oongundu dhopapolitika, nenge omihoko dhimwe ihaa dhi gongala pamwe noshigwana ashihe, dho oongundu ndhoka tadhi gongala, oto adha aantu ya zala iikutu yooparty dhawo dhopolitika.
Oshoshili kutya aantu mbaka oya kanitha oomwenyo dhawo omanga yali mesiloshimpwiyu lyoSwapo ashike sho oSwapo yali tayi lu, noya mangulula oshilongo, oye shi mangululila omuNamibia kehe, kutya nee ogomuhoko guni, olwaala luni nenge ogongundu yini yopapolitika.
Ishewe esiku etine lyaMai olyo esiku lyopashigwana lya etwa po shiikundwa megumbo lyopashigwana, ano ndika esiku lina oku dhimbulukiwa kaakashigwana ayehe, oshoka sho Namibia lya manguluka, olya mangulukila oshigwana ashihe kutya nee omuntu okuli kongundu yopolitika yini.

LEAVE A REPLY

Please enter your comment!
Please enter your name here