Kandjumbwa omutoloki gwomaudhano te shi enditha nawa

0
58

SHIPI ELAGO

ONGWEDIVA – Epandja lyomaudhano muKundana otali tsikile nokuhitilila uukolo waNamibia opo li ku etele mboka ye li thimba yi nongodhi momaudhano moshilongo.

Oshiwike shika otatu ku etele Joviita Ndeendelago Kandjumbwa okakadhona okagundjuka hoka ta ke shi enditha nawa moku toloka omaudhano miikundaneki. Nando Joviita okuna ashike omimvo 21 okwa ndjungaandjunga nale iikundaneki moshilongo nontseyo ye yoku toloka omaudhano. Joviita omwiilongi moUniversiti yaNamibia moka a mona nale onkatu ye yotango miikwaveta noompango. Ashike nando oti ilongele iikwaveta nuutseyimpango Joviita okuna oshitalenti shomaudhano noku ga toloka nosho wo oku ga hokolola. Nando oku li mosikola Joviita oha shanga kombinga yomaudhano , no ha kuthombinga mopolohalama yoSport in focus hayi kala koNational Radio moka ha kala ongomutoloki gwomaudhano.

“Onda putuka handi tala omaudhano ga yooloka naashika osha li sha pendje ohokwe nontseyo yambwalangandja momaudhano gi ili no gi ili okuza pomimvo dhopevi lela,”Joviita a ti. Joviita ota ti okwa nwethwamo kokakadhona okaSouth Africa Carol Tshabalala hoka haka toloka omaudhano moTV yoSupper Sport naa haka ota ke shi enditha nawa muAfrica nopamuthika guuyuni oku toloka omaudhano. Okwa ti oku na ondjodhi yo ku longela ooTV oonene muuyuni ngaashi Supper Sport, noSky TV. “Namibia okuna okulonga oshindji okupendula po omaudhano oshoka natango ondondo yomaudhano oyi li pevi okuyelekanitha niilongo yilwe muuyuni,”Joviita a ti.

Joviita oku uvite kutya iikondo yopaumwene nosho wo aanangeshefa inaya itula mo momaudhano onkene shika otashi tula uudhano monkalo yanyayika unene tuu sho epangelo lya shonopeke omitengenekwafaneko dhiikondo oyindji moshilongo, omaudhano nago ita ga ka thigwa taga hupu nawa. Jovita oku li omuyambidhidha gosipana yoTigers FC moNamibia nomuyambidhidhi omunene gwosipana yoChelsea yokoEngland ndjoka ha yi yambuka moLondon.

“Chelsea oye ta sindana po oliha ndjika kapuna omalimbililo oshoka oyi li ya tulila po oosipana oonkwawo iitsa oyindji sho kwa thigala ashike omaudhano ge li ga ne nando Tottenham Spurs e li monima ya Chelsea, ondi wete kutya ayihe oya pwa nale okulongekidhwa opo Chelsea a pewe ekopi lye ye a shune moliha yo manyakwa gaEurope moka eetha okudhana nale,” Joviita a popi neinekelo.

Ondina ondjodhi opo oomeme ya tameke oku kuthombinga momaudhano opo ku humithwe komeho omaudhano moshilongo.
Joviita oye omvalele yomEtilyasa mOngandjera moshitopolwa Omusati.

LEAVE A REPLY

Please enter your comment!
Please enter your name here