Moshitila Mwa Z’Ondjupa: Osikola yopethimbo lyandje nuulongisikola wandje

0
226

Pethimbo lyetu elongo halyo lya li hali kongo aalongwa, ihe aalongwa oyo ya li haya kongo elongo. Oosikola odha li unene dha pumba no dha li dhi li kokule naamboka ye dhi pumbwa, unene tuu aagundjuka. Pethimbo ndyono pomukunda gwetu pIishikilo ka pwa li osikola, osikola oya li owala kOkatana. Okuza kIishikilo okuya kOkatana opwa li pe na uupadhi, kasha li tashi vulika okuya kosikola. Aamati yamwe yaagundjuka aashona tandi dhimbulukwa ya li ya mona osikola pethimbo lyandje, oomboka owala ya li puukalele pOkatana, yo haa hiti osikola. Ngame pethimbo ndyoka onda kala handi ka menekela koomemegona kooShaamakuti sheEnkono, ngoka a landula meme Ndjelipa yeEnkono, ngoka a li osheeli shoomeme.Meme Shaamakuti okwa li a tungila egumbo lye momukunda Ohailulu, gu li popepi naAmutanga. Osikola yokuAmutanga, oya li owala ookilometa heyali okuza poomemegona. Shika osha pendje ompito yokuya kosikola. Posikola puAmutanga opo ndi ilongela oshindji, ano okuza ngaa kokulesha, kokunyola nokokuyalula. Otandi dhimbulukwa omusamane Martin gaKashweka, ngoka a li omukuluntusikola pwAmutanga, noye a li gumwe gwomaalongi yandje. Sho nda zi nduno kosikola hono kwAmutanga, nda hulile ngaa moongundu ndhoka nda hulile, onda za ko ndi shi okulesha, okunyola nokuyalula. Tate sho a mono nda koka noku ka litha oongombe okwa li i ithana ndje ko koomemegona. Onda kala omasiku gamwe handi yi kuusita, omanga omakwawo tandi yi kosikola, ano tatu ningi omalufo. Mosikola, iinima onda li handi yi enditha nawanawa shampa tuu oongombe dha yi momalweenge, kaape na we uusita.

Esiku limwe otwa li twa tokola okuya kosikola na Timo yaSimeon yaShilongo.Sho tweya kaandjawo yaTimo, he sho twe mu laleke, okwe tu zimine tu ye kosikola. Tse otatu zi ko tu ye tu laleke kaandjetu. Tate okwa yamukula ndje ta ti; “Aupa ngele owa’ala okuha kosikola, shampa owala oongombe dhandje we dhi valele ngu tedhi litha. Ngwee itshewe ngele wa zi kosikola hohe , to tala ngaa kutya otu uka peni mpa tapu ka kala paandjeni”.Molwashoka pethimbo mpoka kanda li tandi vulu okuvala okanona ka ye koongombe pehala lyandje , onda vulika kutate.

Momumvo 1952, osikola yopOmeege oya patuluka. Osikola oya li ye ya nduno popepi nangame. Ngame onda yi nduno kosikola pOmeege tu ki ikongele osikola yetuumbo, ngashi hashi ningwa mOkatoolika. Posikola onda adha po aalongi aakuluntu. Otwa li hatu longwa owala Ombimbeli nOkatikisa mOshiwambo. Katwa li hatu longwa omalaka galwe gokutakuma.Aasamane oyendji mboka ya li ye vule ndje pethimbo mpoka, otse twe ya longa osikola yeshasho nekoleko, sigo ya piti, taya shashwa nokukolekwa.

KIishikilo okulesha nokuyalula onde ya ko ndi ku shi nale okuziilila kosikola kwAmutanga. Sho nduno nde ke ya ndi ki ilonge osikola yetuumbo, opo ndi vule okuya koshililo, aalongi mboka nda adha po oya dhimbulula kutya ondi shi nale okulesha nokuyalula, notandi vulu oku ya kwatha. Aalongi mboka nda li handi longo pamwe nayo, oya li:omukuluntusikola kwa li tatekulu Thomas Evura, naalongi oya li meme Maria gaDavid, meme Amalia gaJohannes nameme Ageshe Indongo, ndele kayi shi Indongo ndji yatate, oyimwe yi ili.Aalongi mbaka oya li yane nangame ongame nda ka ninga omutitano gwawo.

Onda longa uulongisikola uule womimvo mbali netata, okutameka momumvo 1952-1955. Momumvo tuu ngoka (1955), onda thigi po okulonga osikola nonda yi kuushimba. Ano sho nda li omulongi inandi mona epukululo lyankene aalongwa haya longwa, ihe onda hogololwa owala posikola mpoka, ndi longe yakwetu. Ombiimbeli onda kala konyala ndi na omutse omupu oku yi tseya.Onda kala unene ndi hole okulonga okatikisa. Ngele tandi popi Ombiimbeli nandi popye oshinima sha yela kutya, pethimbo mpoka moosikola dha Katoolika kamwa li hamu longwa Ombiimbeli yo yene , ihe omahokololo owala ga za mOmbiimbeli. Omahokololo ngoka gomOmbiimbeli, ogo nduno naanaa twa li hatu longo.

Sho twa ka tameka okulonga okulesha nOmwaalu, aalongi mboka aakuluntu Omwaalu kaya li ye gu uvite ko nando, posikola ongame nda li ndi inekelelwa oku gu longa. Onda kala tandi futwa iimaliwa iishona, ano iithilinga itano komwedhi.Shika osha tokolitha ndje ndi lombwele Pata kutya otashi vulika ndiye kuushimba. Pata sho nde shi mu lombwele okwa gwedhele ndje ko iithilinga iyali nosipenitha tandi kala nduno handi kwata iithilinga, ano iheyali nosipenitha komwedhi.
Ondjambi yo yene kaya li hayi futwa aantu komwedhi, ihe oya li hayi kwatwa koshikako, ano konima yoomwedhi ndatu.
Koshikako onda kala nduno handi kwata oponda niithilinga iyali nosipenitha. Oponda niithilinga iyali nosipenitha natango onde ke yi mona iishona. Konima ondi iyaka po ashike. Sho osikola ya fudha efudho lyopehulilo lyomumvo, muJanuali manga aantu inaya tameka osikola ngame onda zala nale okaholo.

LEAVE A REPLY

Please enter your comment!
Please enter your name here