Nakutamanekwa meso lyaJahiteeri natango okuli mokakuma

0
749

MARIA NAMUPALA

ONDANGWA – Omukiintu omugundjuka ngoka a mangelwe po omwedhi gwa ziko ta tamanekelwa edhipago nekuthe mo lyetegelelo okuli natango konima yekumba nokwa tegelela epwilikino lyeindilo lyobooloha.
Etitano lya zi ko omufekelwa okwali a holoka oshikando oshitiyali mompangu ya mangestarata mOndangwa, ashike oshipotha she oshuundulilwa komeho sigo omomasiku 20 gaJuni nuumvo.
Ndinelao Matilde Mateus okwa mangwa po molwehokololo kutya okwa kwathele Jahiteeri Nyanyukwa Nuuyoma, ya kuthemo epunda, ashike kuume ke ngoka okwa ka hulitha konima yonkambadhala ndjoka, nomukiintu ngoka okwa tulwa ihe miipandeko, ta tamanekelwa iipotha iyali shedhipago naa shoka shoku kuthamo epunda.
Omufekelwa nguka sho a holoka mompangu ina pulwa a tye sha, namangestrata Peter Nangula okwa ti omolwomakonakono gopolisi inaa ga pwa oshipotha she oshuundulilwa komeho, shi gandje natango ompito kopolisi yi manithe omakonakono.
Molwaashoka Mateus okwa konga hahende gwepangelo, Etitano ndyoka ina nguka ina vula okuholoka, ashike otaka holoka pethimbo omufekelwa ta ka galukila mohofa, ko ku tsikilwe nepwilikino lyobooloha ku talike ngele ota vulu okupewa ompito yokwiifutilamo.
Oshipotha shika oshuundulilwa komasiku 20 gomwedhi twa taalela, na Mateus ota kala konima yekumba a tegelele esiku ndyoka a tale ngele ota vulu okutulamo eindilo lyeifutilemo mondholongo.
Nangula okwa yelitha kutya iipotha mbyoka iyali tayi tamanekelwa omufekelwa, oyi li ompinge noveta , nonkene ita mangululwa manga ota ningi aye omakonakono gopolisi moshipala.
Nangula ta uvaneke kutya momasiku ngoka taka galukila mompangu omakonakono otaga ka adhika ga pwa.
Nakusa Jahiteeri otaku hokololwa a kwathelwa komufekelwa a kuthemo epunda lye, nokwa hulithile mondunda ya naku mu kutha epunda. Pethimbo ndyoka nakusa okwa adhika omuniilonga mu yimwe yomoositola dhiipumbiwa yesiku kehe mOndangwa. Ekuthomo lyetegelelo olya ningililwe molukanda Uupopo mOndangwa moshitopolwa shaShana.
Ota ku hokololwa kutya shika hasho oshikando shotango Mateus ta longo iilonga mbyoka, otaku popiwa anuwa ha kuthamo omapunda ogendji noha pula oondando dha yooloka noshimaliwa shoka ha pula aayakulwa ye, oshi li pokati kooN$1000-2 500 lwaampoka, niilonga mbyoka yoku kuthamo omategelelo ohe yi ningi pamwe nookuume ke.

LEAVE A REPLY

Please enter your comment!
Please enter your name here