Natiili otaka futila Ndakukamo

0
351

LOIDE JASON

ONGWEDIVA-Oshikondo shOmudhingoloko nOmatalelo po osha uvaneke tashi ka futa omunafaalama Andreas Ndakukamo molwekanitho lyoongombe dhe dhili omulongo nambali ndhoka dha lika po koonkoshi oshiwike sha yi.
Iimuna mbika okwa hokololwa ya dhipagwa koonkoshi oshiwike sha yi moshikandjohogololo Otamanzi moshitopolwa Omusati.
Omupopiliko gwoshikondo shika Romeo Muyunda okwa koleke kutya uuministeli we otawu ka futa ongombe kehe nooN $1 500 uuna ya manitha omakonakono gawo moshinima shika. Ta shi ti Ndakukamo ota ka mona oodola 18 000-00 ongofuto yoongombe dhe omulongo nambali dha dhipagwa koonkoshi ndhoka.
“Otwa taamba olopota moshinima shika naanambelewa yetu oye li moshitopolwa shoka taya konakona oshiningwanima shika osho wo otaya landula oonkoshi ndhoka opo ye dhi shunithe koshikunino shiinamwenyo” Muyunda a ti.
Okwa ti okwa tumwa oongundu mbali dhaanambelewa yimwe oya za koshikunino shiinamwenyo mEtosha omanga onkwawo oya za koombelewa dhopashitopolwa mOngwediva.
Ndakukamo okwa hokololele Kundana kutya ye oku uvite nayi molwashoka okwa kanitha nenge oha kanitha iimuna oyindji omumvo kehe okuza tuu omumvo 1995 ihe nando okutseyithile oshikondo shika kombinga yiilikama mbika, oshikondo shomudhingoloko aluhe ihashi mu kwathele mbala.
Okwa ti aluhe oha tokola okudhipaga oonkoshi ndhoka ye mwene molwashoka aanambelewa yomudhingoloko ohaya tindi oku itaala ehokololo lye.
“Omimvo omugoyi dha piti onda dhipaga oonkoshi omugoyi ngame mwene molwokuuva nayi. Onda tseyithile aanambelewa kombinga yoonkoshi ndele yo oya ti ka pe na oonime.Ohandi dhi yaha opo ndi ya ulukile kutya oonkoshi omo dha li momudhingoloko ngoka,” osho a ti.
Okwa ti oku uvite nayi sho ta kanitha iimuna ye tayi lika po kiikwakuti mbyoka ya gamenwa nenge mbyoka yi na okukala ya silwa nawa oshimpwiyu.
Okwa indile oshikondo shOmidhingoloko opo shi longe nawa olugumbo lwehala lyiinamwenyo opo mbika yaa iya ke mo we ngaashi mbika ye shi ningi.
Ndakukamo okwa ti yo ongaanafaalama oya longa nuudhiginini oku tunga po iigunda yoongombe yithike mpoka. Ihe ngashingeyi iilonga yawo mbika otayi halakanithwa po momukalo nguka unene tuu pethimbo sho ngashingeyi yo yaa na we naanaa oonkondo okutungulula omiyalu dhiigunda yawo. “Ngele opena omulandu gwokufutila aantu mboka ya yonenwa kiiyamakuti nena mbaka naya futile ndje okuza petameko sho ngaa nda tameke okukanitha iimuna yandje molwoonkoshi unene tuu uusino, oongombe niikombo. Ngele oye shi ningi otandi ya pandula” osho a ulike.
Okwa hokolola wo kutya okuna okopi yombapila ndjoka ye a shangelele koshikondo shoka omimvo dha pita po ihe ina mona ko nando eyamukulo lili nawa.

LEAVE A REPLY

Please enter your comment!
Please enter your name here