Oshivilo shomakolofishi osha enda nawa

0
173

TUULIKKI ABRAHAM

Lüderitz – Oshivilo shoipindi shokomudo shedina Lüderitz Crayfish festival, osho sha danwa oshikando oshitimulongo neudo, osha enda nawa lela.
Vahapu ovo vali va mona omhito yokukala poshifvilo eshi otava hokolola kutya osha enda nawa, lela.
Oshivilo shoipindi shokomudo osha hovelele mEtine la djako nosha xulu Etivali loshivike eshi.
Oshivilo osha yeululwa pambelewa mOlomakaya la djako kOmupedupresidente Dr. Nickey Iyambo. Oshivilo oshali sha kalwa keeMinista, koilyo yomutumba wopashiwana, kookansela vomalelo eedoolopa noi kandjohoololwa, okudja keembinga neembinga doshilongo.
Ou ali nale Omuprima woshilongo Omundokotola Libertine Amathila, oo oye a patululile oshikando shotete oshivilo shoCrayfish modula 2008, naye okwa li a mona omhito yokukala poshivilo opo, eshi sha wanifa eedula omulongo neudo.
OmuPremier wokoNorthern Cape moSouth Afrika nosheendo shaye naye okwa li a mona omhito okukala moshivilo shoipindi shokomudo, eshi.
Kansela woshikandjohoololwa shOndangwa yOkomikunda Kaushiweni Abraham, nae okwali a mona omhito yokukala poshivilo shomauliko oipindi okomudo modoolopa ya Lüderitz.
Onda li nda mona omhito opo ndi popye naye noku mu pula kutya oshivilo osha enda ngahelipi. Abraham okwa tumbula kutya oshivilo shoCrayfish osha enda nawa neenghono, oshali tashi ulike kutya osha longekidwa lela pambelewa, okushitalela kovanhu ovo vashivwa, na unene tuu kosheendo sho va nambelewa ovo vashivwa okudilila poushiinda moSouth Africa.
Ota ti oshivilo osha kalwa kovanhu vahapu.
Kansela Abraham okwa tumbula kutya mokukala poshivilo eshi shoipindi, okwelihongamo shihapu, nokwa mona yoo omhito yokutopolelafana eewino noombushe yae moilonga.
Ovanangeshefa okudja moitopolwa ya yooloka moshilongo, navamwe vadja kondje yoshilongo ngaashi koTanzania, nokoKenya navo yo ovali va mona omhito yoku ulika nokulandifa oipindi yavo.
Evelina Namupolo adja koIpandayamiti koshitopolwa sha Musati, ota ti omauliko oipindi neudo modoolopa yaLüderitz okwa enda nawa noku landifa okwa landifa lela nawa, okuyelakanifa, nodula yadjako shaashi namo okwali a mona omhito yoku kufombinga.
Margret Musongo adja koTanzania ota tumbula kutya oshivilo sho Crayfish neudo osha longekidwa nawa, outala vokulandifila ovalongekidwa na otava monika nawa lela, nonghalo yomhepo oya li iwa neenghono.
Musongo nae okwali a kufombinga moshivilo shoCrayfish odula yaya. Ota tumbula kutya, neudo opena eyooloko, okuyelekanifa nodula yaya, osho Musongo a tumbula kutya oshivilo otashi xumu komesho lela.
Vahapu ovo vali tava landifa moshivilo eshi shoCrayfish Festival, otava hokolola, sha enda nawa. Selma Gabriel adja ko Rosh Pinah, ota ti, okwa kufombinga moCrayfish Festival oikando ihapu, ashike neudo osha enda nawa lela, “aame ashike mboli nda lwa ondede, ondeya inaa ndi lilongekida nawa neudo.” Gabriel osho a tumbula.
Okakadona dingi oko taka ufanwa Miss Crayfish Festival 2017 epapa ola ya nomunamido 23 Ester Johannes, first Princes epapa ola ya na Luealla Engelbrecht omunamido 19, omanga omunamido 21 Hilma Paulus oye aya nepapa louSecond Princess.
Oshivilo sho Crayfish neudo osha kalwa kovanhu vafika lwopo mayovi a hamano.

LEAVE A REPLY

Please enter your comment!
Please enter your name here