Shiweda a kumike oshigwana shi tsike omiti

0
56

MARIA NAMUPALA

ONANKALI – Omupevi minista mUuministeli wUunamapya Omeya nOmithitu Anna Shiweda okwa kumike oshigwana shi longe nuudhiginini moku tsika omiti odhindji momidhingoloko dha sho.
Shiweda ndhino okwedhi popi omasiku ga zi ko moonkundathana dhe naKundana kombinga yetsiko lyomiti momidhingoloko. Okwa ti oshinakugwanithwa shaaNamibia ayehe ya kwashilipaleke kutya momidhingoloko dhawo omwa tsikwa omiti dha gwana.
Okwa ti omiti ndhoka dha pumbwa okutsikwa ka dhi na ondjoolola. A kumike aantu ya kune omiti adhihe dhiiyimati osho wo dhominzile oshoka omuti kehe ogu na oshilonga shagwo momudhingoloko. Uuministeli otawu andjaganeke moshigwana etumwalaka lyowina, opo aantu ya kumike noku pewa ohokwe yoku tiska omiti.
Omupevi minista okwa gwedha po kutya etsiko negamenene po lyiihwa nomiti olya pumbiwa moshigwana. Nokwa indile oshigwana shi kune nokutsika omiti opo ku keelelwe embugapalo, wo uunshitwe nomidhingoloko dhi kale aluhe dha gamenwa.
“Oshilongo shampa shi na iihwa nomiti dha ziza nawa ohashi hwepopaleke onkalo yaantu niinamwenyo yo taya kala taya fudha nawa, yeli momidhingoloko dhina ombepo tayi pepe nawa,” Shiweda ta ti.
Okwa kumike oshigwana shi simaneke omiti nuushitwe go omudhingoloko gwoshilongo gu vule okukala gwoopala naamboka yeli mo ya kale yu uvite ombili nuugumbo sho ye li mombepo ombwaanawa nomomiti dha hapa nawa.
Okwa tsikileko ta ti omiti oshinima sha simana meliko yoshilongo molwaashoka ohadhi vulu okulongithwa miinima oyindji, onkene etsiko nekuno lyadho oli na uuwanawa owundji. Okwa kumike kehe ngoka ta tete po omuti a kale a tsika po natango gumwe nelalakano lyokuyanda embugaleko lyomudhingoloko.
Shiweda okwa ulike kutya miitopolwa oyindji moka tamu adhika iihwa nomiti ohamu mono omuloka omwaanawa, no ha shi eta omvula ya gwana niipalutha yaantu niinamwenyo.
Okwa kumagidha aavali naalongi pomanongelo ya kumike aalongwa ya kale nokutsika omiti dha gwana, yo ya tseyithilwe esimano lyomiti moshigwana.
Okwa ti Uuministeli wUunamapya ota wu gandja oshiholelwa oshiwanawa metsiko lyomiti, nokwa totwa oopoloyeka ndhoka tadhi hwahwameke etsiko lyomiti moshigwana.
Poombelewa dhuuministeli odhindji ohapu monika uumuti wokukuna no wo ku tsika kwaamboka ye wu pumbwa. Ta endulula ishewe kutya oshilongo osha pumbwa shi kale sha ziza nawa, sho shi kale tashi mono omvula ombwaanawa

LEAVE A REPLY

Please enter your comment!
Please enter your name here