Woo omukifi womalodu moNamibia

0
418

OUTAPI – Oovene vomikunda, nava shange omadina aavo itaa va longo omapya. Eingido ola ningwa kukansela woshikandjohoololo Outapi Philemon Shikwambi molwomukifi womalodu moshiwana, mu na ovanhu hava pitile poukamba.
Shikwambi ota ti, eshi epangelo la tameka kuhavaleka oshiwana oikulya yoshikukuta, ovanhu vahapu paife ihava longo vali omapya ngaashi nale.Onghee a indila oovene vomikunda moshikandjohoololo Outapi va shange aveshe ovo inaa va lima omapya avo neudo ve li poukamba, opo ombelewa yae i va kumaide.

Luhapu nande, ovawiliki voshiwana va kumaida ovanamapya va tameke oilonga ngee kwa lokwa, novaleli vamwe va tula po oveta yeevili dokupatulula oukamba, inashi kwafela sha. Ovakwashiwana vamwe va kotoka, ohava pitile eengula dinene koukamba tave li idilile mo tava nu omalodu tava yeulula eendingosho pefimbo lomutenya.

Omukundu womalodu owa eta enyonauko linene moshiwana sha kanifa omifyuululwakalo, sha ninga shindede nosha kanifa eendunge. Kansela Shikwambi, okwa yandja oshihopaenenwa shovadali novatekuli hava pitile peekamba fiyo okeenguloshi kutya, itava wanifa po outeku wounona noilonga momaumbo. Shikwambi ota ti, ina kelela ovanhu va nwe omalodu, ashike okwa ti nava nwe oshiyeleke.Te va pula va lundulule shaashi otava yandje oshihopaenenwa shii komapipi okomongula.

Omukalelipo wepangelo moshikandjohololo Outapi, okwa ti okunwa wa pitilila oto dulu kuninga oinima yii. Omahepekafano momaumbo amwe okwa etifwa komalodu, oiponga imwe po tai ningwa meendjila daNamibia oya etifwa kovashingi va nwa omalodu.
Ta yandje oshihopaenenwa shomwaalu wovanhu vahapu ve dulife pomulongo, va fya pefimbo lomeva moshitukulwa shaMusati, vamwe omoshikandjohoololo Outapi, vamwe ova li tava di koukamba etango la toka noshi shiivike nawa kutya, omalodu ihaa kwatafana nomeva. Omukwateli komesho woshikandjohoololo Outapi okwa twa oshiwana omukumo shi diinine oilonga yomake shi ha ka ehele oikulya opo shi ha dinike.

Onghee okwa kumika oshiwana shi longife eloololoo li yadi ko neudo, eeshi, eenhangu shi likole eembe, eefukwa nomakunde opo omaumbo a kale neendja fiyo oketeyo tali ka landula ko. Shikwambi okwa yandja etumwalaka eli owina koshikundaneki Kundana , kwaaveshe ovo inaa va hala kulonga sha.

LEAVE A REPLY

Please enter your comment!
Please enter your name here