Ya tindi okulundululwa mo mondoolopa

0
130

LOIDE JASON

ONGWEDIVA-Efamilia ndyoka lya tungila komunkulo gwondoolopa Okongo moshitopolwa shaHangwena olya ti lyo itali zi po mpoka puna egumbo lyawo oshoka elelo lyondoolopa olya hala okuli nyokoma.
Saima Nangolo ngoka oye a popileko efamilia lyawo okwa ti nonande ita ya yi ehumo komeho moshipala, yo ita ya vulu oku itaala enyokomo lyelelo lyondoolopa oshoka yo otaya kanitha oshindji ngele oye shi ningi unene tuu sho she ya pula oshindji nethimbo ele okutunga po shoka ye na nena. Nangolo okwa ti tango tate gwa wo okwa li a itaala ya futwe po opo ya gandje evi kondoolopa ihe konima sho elelo lyondoolopa lya tameke oku dhiingoloka he naye okwa tokola opo a kale mpoka.
“Ngame sho ndali nda lombwelwa sho omatendo ga ningwa okwa li ya lombwela tate kutya egumbo ota li kala po epya olyo ashike nandi gandje kelelo lyondoloopa. Ashike ngashingeyi oya hala egumbo lyandje ndele nepya woo, shoka ndi wete kaa shi li mondjila,” Nangolo a ti ngaaka.
Nangolo okwa ti kutya yo ka yu uvite ombili sho elelo lyondoolopa tali ya lombwele kutya oyena ashike oku za po omanga yo yu uvite kutya ngele ya zi po otaya kanitha iilikolomwa yawo oyindji.
Ashike omukuluntupitithi gwelelolyondoolopa ndjoka Wodibo Haulofu okwa ti ondando yoshimaliwa shithike pomiliona oshinkwanu yimwe oya kwatela mo epya ndele negumbo ndyoka.
Haulofu okwa ti ehala ndyoka olya nuninwa ongeshefa ndjoka ya hala oku tula po omalusheno getango opo yi vule oku landitha.
“Ashike ngele efamilia ndyoka inali hala tse itatu li thiminike otashi zi ashike keuvathano ,” Haulofu a ti ngaaka. Ashike Nangolo okwa ti elelo olyo tuu ndyoka ota li ya lombwele kutya oyena oku za po ya hala inaa ya hala. Shoka ta ti kashi li mondjila oku lombwela omuntu kutya ota zi po a hala nenge inaa hala.
Nangolo okwa ti kutya nonande He okwa li a zimina sho efamilia lya yi muule woshinima oya mona kutya opuna ekengelelo eshona itaali tsu kumwe naashoka shali sha ziminwa petameko.
Ngoka oye omuunganeki gwe kongo lye hala lyongeshefa ndjoka Twakondja Shikongo okwa ti kutya yo otaya landa ashike evi kelelo lyondoolopa ihe ngele mpoka ya nuninwa inaya pewa po nena shoka otashi zi kelelo okuya pa pehala limwe li ili.
“ Ngame itandi vulu okukondjitha aantu ya landithe po nenge ya thige po ehala lyawo oshoka ngame omulandi owala,” Shikongo a ti ngaaka.
Ashike Haulofu okwa ti evi ndyoka ombinga yimwe oyi li momusinda gwondoolopa omanga ombinga onkwawo yili kondje. Onkee nduno okuna omutumba omunene gwa tegelelwa oku kala ko opo oombonge adhihe hadhi ungaunga naashika dhi ka ninge omatokolo.
“Oshinima shika natango oshi li metifa lyoonkundathana pokati kooyene yevi ndyoka noombonge ndhoka dhi na mo oshitopolwa. Onkee inatu adha natango etso kumwe,” a ti ngaaka.

LEAVE A REPLY

Please enter your comment!
Please enter your name here