America ota kondjifa elandifo loifitukuti shiheli paveta

0
41

OMUTOOLINGHUNDANA

Windhoek – Ombelewa youkaleliposhilongo waAmerica moNamibia oya yambidida omadeulo ovanailonga vokutalanawa oilandifomwa keengaba noshoyo vamwe vomovanambelewa vokulwifa oimbuluma moshilongo. Oshimaliwa eshi sha longifwa momadeulo, oshali sha yandjwa kepangelo lAmerica koshikondo shi lile po okulwifa oingangamifi hano shedina Bureau of International Narcotics and Law Enforcement Affairs (INL).Eetundi edi otadi ka kwafela ovo va deulwa opo va ka fikile tava tula moilonga osho va hongwa, unene tuu ekondjifo lokuvakela ile okuvaka mo oifitukuti moshilongo. Edeulo eli olili oshitukulwa shopoloyeka yedina World Customs Organization INAMA Project, osho sha dja koshitya INAMA, shili melaka loshiBemba hali popiwa moZambia, tashi ti oifitukuti. Opoloyeka ei oilile po eyambulepo lokukonaakona oipindikomwa peengaba okukwashilipaleka kutya okwa kelelwa omalandifo oinamwenyo noimeno oyo ya amenwa moshitukulwa shaSub-Sahara Africa. Oule weedula nhatu da pita, epangelo laAmerica ola yambida opoloyeka ei noshimaliwa shifike peedola omilliona imwe ya America, hano shifike lunga poN$13.6 million (yaNamibia), noyeshi ninga okuyambidida Namibia opo a lwife ookalyamupombo ovo tava vake moshilongo oifitukuti noimeno ile oilongomwa yayo. Momadeulo aa okwali muna ovakufimbinga hanho ovalongi vokeengaba novakalekipo voveta neameno veli 30, va dja moilongo ngaashi Angola, Botswana, Ghana, Hong Kong, Malawi, Malaysia,Mozambique, Namibia, Nigeria, Singapore, Tanzania, Thailand, Uganda, Vietnam nokoZambia.Eshi a patulula exulifo leetundi edi pambelewa, Deputy Chief of Mission John Kowalski waAmerica okwa ti konyala oilongo aishe oina eeveta dokutala nawa omalinyengo oipindikomwa keengaba, ashike oshi li yoo oshinakuwanifwa shoshilongo keshe okueta po omikalo dokulwifa omalandifo ehe li paveta. Ta pandula yo ovanailonga vokeengaba vadja keenhele nokoilongo ya yooloka eshi va kufa ombinga momadeulo.

Uazapi Meando oo ta longo ponhele yomutwe woshikondo osho shi li koshi youministeli wemona moNamibia okwa ti eameno loushitwe ota li kalekwa po ashike ngeenge oyoongi-ilonga neetundi ngaashi naana odo oya kalekwa po shaashi otai kulike eshiivo lova nailonga vokeengaba okushiva kutya vo otava lwifa ngahelipi ovo tava piyaaneke oifitukuti noixwa ya amenwa moshilongo.

LEAVE A REPLY

Please enter your comment!
Please enter your name here