Ehiyo lyoshigongi shoshigwana shOndonga

0
212

MARIA NAMUPALA

ONDANGWA – Oshigwana shaNdonga otashi tseyithilwa kutya otaku kala oshigongi shomeendelelo shaakalimo ayehe yomoshitunda shaNdonga,tashi kalako Olyomakaya ndjika poombelewa oonkulu dhelelo lyaNdonga pOluno.

Onkene otaku indilwa aantu ayehe ya kale ya holoka opo yi ipulakeneneko yoyene, yo taya pula woo omapulo mpoka kaaya uvite, yo taya kundathana iilalakanenwa yElelo lyOndonga, nokutala mpoka oshitunda tashi endekele.

Gamwe gomomalalakano goshigongi ogo oku kundathana nokukonakona etokolo lyompangu ndyoka lya ningwa Omaandaha goshiwike shika ano momasiku ga8 Mai, nokutala woo kutya oshizemo oye shi panda nenge ina shi ya mbilipalela.

Otaya ka tala woo shoka tashi ningwa po sha landula oshizemo netokolo lyompangu.Iilyo yElelo lyOndonga mbyoka yali ya lalekwa miilonga yuuwiliki woOndonga omwedhi gwayi oyo ya li ya ningi eindilo kOmpangu yOpombanda moka ya indile ndjika yi ya pe uuthemba opo ya kale taya thiki pOmukwaniilwa pwaana shoka tashi ya imbi oku shi ninga. Aawiliki mbaka oya li wo ya indile ohofa opo yi gandje elombwelo opo Omukwaniilwa a konakonwe koondohotola opo kutalike ngele okuli tuu nawa nokutsikila okuwilika Ondonga.

Ompangu oya gandja etokolo lyawo Omaandaha ya ti aawiliki mbaka ka ye na oonkondo nuuthemba oku ninga eindilo ndika pehala lyElelo lyOndonga oshoka kapwa li pwa ningwa oshigongi mpoka pwa tokolwa oshinima shoka.

Onkene oonaku fala eindilo ndika kohofa ka ye na uuthemba oku za kElelo lyOndonga opo andola yeli ninge.Omasiku ga ziko omalenga gahetatu oga kuthwa miilonga mokati kago omwa kwatelwa Joseph Asino, Vilho Kamanya, Fillemon Nambili, Kashona kaMalulu, John Walenga, Tonata Ngulu,Peter Kauluma na Joseph Akawa. Omalenga ngaka oga kuthwa oshilonga shuuleli anuwa oshoka itaga vulika kelelo na ishewe otaga eta etopoko mokati kElelo lyOndonga.

Ehiyo ndyoka inaali ulika kutya olya zi kulye otali indile aakwashigwana ayehe yehe ya kale ya holoka koshigongi shoka, oku ka kundathana shoka shili melelo lyOndonga, nonkene yena okukondjitha omatumpakano nokukala ya hangana, yo taya kalekepo Ondonga ngaashi ya kala yili melandulathano no tayi pangelwa kombili.

LEAVE A REPLY

Please enter your comment!
Please enter your name here