Moshitila Mwa Z’Ondjupa: Ondjokonona yokathanguthangu, ano ombasikela monkalamwenyo yandje

0
146

Pethimbo lyokuputuka kwetu manga inaatu adha mepipi lyokuya kosikola, uumbasikela owa li inaa wu holoka manga. Oombasikela sho dha ka holoka, ngame omumati omunene. Pethimbo ndiyaka nda hokolola metetekelo twali tatu kondjo nuukongo, kapwa li pu na oombasikela. Omumati ngoka e ke ya nombasikela tango oUugwanga waAshipala gwokwIikuku. Uugwanga waAshipala, oye gumwe gwomaantu yotango mboka ya landa tango ombasikela pomikunda dhetu. Pethimbo ndiyaka ombasikela mUukwambi otwa hatu yi ithana okathanguthangu. Lumwe oya li hayi ithanwa okakambe koshiyela.

Edhina ombasikela olye ke ya ngaa lwopiikati mpo. Kombinga yombasikela, otandi dhimbulukwa oshiningwanima shiyolitha shi na sha nombasikela.

Ngaashi nde shi tumbula metetekelo, mondjokonona yombasikela, ngame ombasikela nda kayila oshinano oshile, oya li yomusamane gumwe gwo-mumwameme,Uugwanga waAshipala, a valwa komumwayina gwatate.Uugwanga waAshipala, omulumentu a li po omwaanawamuntu ngi, mba haku tiwa, iitenya.

Pethimbo ndyono oombasikela kadha li po odhindji kape na ngoka te yi ku mathitha nokuli wu ende nayo.
Osha li oshinima oshikumithi. Uugwanga sho e ya nombasikela, onda kala handi yi kootategona kooAshipala sheEnkono kwIikuku.
Tatu kala ngaa hatu ilongo okukayila ombasikela yUugwanga ndjoka.

Ngaye onda tshuwa oku hi londa shwepo. Esiku limwe ngaye otandi zi po nombasikela he, nde hi mwiindila ngaa ndi ze po naho, ndi ka talele po memegona kOhailulu. Sho nda galuka kOhailulu nde hi londa, eemuta odho owala dha yulu. Sho nda ka ha mokavugu ndi pite mo andola, onda gu ko.

Moku hi yelutha mo mevugu, ohaluka okugulu kwokomeho kwa gu ko, ihe oomuta inadhi gwa ko.
Go omafoloko gaali gokugulu otaga tsu mevi nokuli. Onda li nda haluka neenkondo. Sho ombasikela ya yululuka, onda li ndi li kokule, konyala opo owala nda konda Okatana.

Ondu umbata po ombasikela ndyono kepepe,nokugulu nde ku endjidha, e tandi ende ndu uka kaandjawo yUugwanga waAdhipala kwIikuku, uule wotshinano tshookilometa dhi thike lunga 40 lwaampoka, tandi ende uusiku awushe. Sho nde ya ndi thike mootate Ashipala sheEnkono, konyala eluwa tali tende.

“Otshikwatshike tashi kweenditha uusiku? Osho mwene gwombasikela a pula. “Ombasikela oha yonuka” osho nda yamukula nuutile. “Ohi li peni?” mwene gwombasikela ta pula. “Onde hi egeka kiiti yontu pondje” osho nde mu yelithile.

Ye mwene gwombasikela ote ya, ta talaatala ombasikela ye. “Oh ngwee mentu ngwee gwomumwameme, hamba ombasikela oha shalakana po!
Ombasikela ndjino otahi ka longa ngaa wee ndjino?” osho a pula.

Uumbanda wandje owa gwedhelwa kepulo ndyoka, nda li kandi li nine eyamukulo.Ngaye momwenyo otandi ipopile tandi ti “Ombasikela haantu nde hi yona itahi ka longa we”. Konima sho a mana oku yi simonona, okwa lombwele ndje kutya okugulu inaku teka, okwa gwa ko ashike. Okwa kutha okampunda heya haka kala niipatululo, heya haka kala konima ke egamena komutumba gwombaskela.

Ta tshuna ko okugulu niipatululo mbyo. Ngaye ondi wete omulumentu ta londo. Ngaye aae-e, nani ombasikela inahi teka. Kombinga handje kutya nee oha li ha papa, nokukutha mo otyupa kanda li ndi tshi tshi, ndele nota-la okugulu kwa gwa ko nokuli, otsha li onkumwe niishuna yowala kungaye.Onda li nde tshi za. Hee ndu umbatele ombasikela ndjono nokugulu kwaho.

Ngaye he ningi ngaa te vululukwapo. Otshinima shono shampa wala tandi tshi dhilaadhila sigo onena, ote ti wala kaku na omuntu iha kala omugoya.

Ngashiingino, opwa pita eemumvo omilongo hamano nambali, sho otshiningwanima shono tsha holokele, ndele shaa wala nda piti pehala mpono, otshinima shono ondi na oku tshi dhimbulukwa. Sho nee nde keya ndi lande ombasikela handje mwene, ngele otandi ende po peshala mpono, ohandi ti owala: “Kanda li omuntu kaya!’

LEAVE A REPLY

Please enter your comment!
Please enter your name here