NFA nuuminsteli ya pewa omasiku 30 ya galule oliga

0
104

SHIPI ELAGO

ONGWEDIVA-Ehangano lyaadhanitanga moNamibia olya gandja omasiku 30 kUuministeli womaudhano pamwe noNFA opo ya kale ya galulila uudhano wetanga lyokoompadhi mondambo. Olsen Kahiriri ngoka eli gumwe gwomaatoti yehangano ndika okwa li a hololele Kundana kutya ehangano lyawo oli li omeho nomakutsi gaadhanitanga moNamibia onkene ethimbo olya thika opo ya ninge i popila to lika.

Kahiriri okwa ti “oshikumungu shokatanga kokoompadhi moNamibia osha guma oonkalamwenyo dhaantu oyendji okuza ngaa kaadhani, aavali yaadhani nosho tu aaholi naatali yokatanga kokoompadhi”.

Pethimbo a li moonkundathana na Kundana, Kahiriri okwa li a holola kutya ehangano lyawo olya pe epangelo okupitila mUuministeli womaudhano na NFA omasiku omilongo ndatu opo ya galule uudhano wokatanga kokoompadhi moshilongo.

Kahiriri okwa ti aaNamibia na ya kale ya tegelela shoka tashi ka landula konima yomasiku 30, oshoka otashi vulika ya ka mone omanyakwa haga dhana mooliha dhomoshilongo geli ishewe mokapale.

“Eeno shika oshina okuningwa notwa hala epangelo wo li fatulule kutya aanyasha yaNamibia oye ya ninga shike oshoka yamwe ohaya mono iiyemo yawo okupitila metanga onkene olya pumbwa oku kuthako omaudhano ongoshinima sha simana,” Kahiriri ta ti.

Okwa ti ngashingeyi NPL kena omukundu gwoshimaliwa oshoka opuna omahangano geli gatatu gatula po oshimaliwa shoka sha pumbiwa, ashike omukundu ogu li melelo lya NFA na NPL mboka ye na omukundu, naashika oshi li ta shi tidha po aakwashilipaleki mboka ye wete kutya pamwe oshimaliwa shoka ta ya gandja ita shi ka longithwa naanaa muuwanawa wokatanga kokoompadhi .Omasiku omilongo ndatu oga li ga tameke ohela konima sho ehangano lyaadhani lya li lya ningi omunyanyo okuya pegumbo lyokatanga kokoompadhi moKatutura okugandja omukandanyenyeto gwa wo.

Ehangano lyaadhani ina li popya kutya ota li ka ninga po shike ngele omanyenyeto gawo ina ga gwanithwa po konima yomasiku 30 ngoka ya gandja kUuministeli womaudhano NFA osho wo Okommisi yomaudhano moshilongo ya kale ya galulila etanga moshilongo.

LEAVE A REPLY

Please enter your comment!
Please enter your name here