Opolifi moKavango West otai ka longa oshiwana

0
46

HELVY SHAANIKA

Ongwediva – Opolifi moshitukulwa shaKavango –Uninginino (Kavango West) otai ningi omaxwaxwameko okulonga oshiwana kombinga yekwatafano liwa pokati kopolifi noshiwana.

Kakukutu komatanga opolifi moKavango West Commissiona Olavi Auanga okwa holola kutya neudo, opolifi otai ka ninga oyoongalele noovene vomikunda, aanamikunda, eefikola, ovanafaalama, eengeleka, ovakwanepangelo, omahangano ehefi opapangelo nosho yo ovanangeshefa moshitukulwa.

Ava otava ka kundafanwa navo shina sha neeveta detendululo ledu, doulunga woimuna, oishoshela yepangelo, elandifo lomalodu, omalelo opamifyuululwakalo, eemhango domeendjila, eendjebo noikuti, ekwatonghonga, eameno lokeengaba, omahepeko omomaumbo, ekalekepo neameno loushitwe, oimbuluma ya longekidikika, engudumano lovanhu momuvalu munene, ombili nelandulafano, naikwao ihapu.
Auanga ta ti, elalakano loyoongalele olo okukaleka po ekwatafano liwa pokati kopolifi noshiwana, okulonga oshiwana eeveta nokukeelela oimbuluma moshitukulwa.

Auanga ta ti opena omhumbwe okueta nokukaleka po ekwatafano liwa pokati kopolifi, ovanafaalama neefikola, nopo yo kulongwe nokulongekida oshiwana shokomongula opo shi kale oshikaleki po shoveta nelandulafano.

Ta weda po ta ti oshitukulwa osho, opo sha tetwa ko koKavango Ushilo (Kavango East) nasho oshapumbwa yoo okuuya po nomatanga oku lwifa oimbuluma ngaashi eerisevists, Women and Men Network, naavo tava kala nokunofwela ko opolifi monanguwi ngee pena oimbuluma.
Auanga ta ti okudja omwedi wa dja ko, ye novanambelewa vaye otava kala nokutalela po eembelewa noovenevomikunda omo tava ka kundafana eeveta nekotamhango loshilongo omo unene tava ka kuma kOshiluko Oshititatu shEkotamhango laNamibia, oko taka popi kombinga yopolifi.

Otaku kakala yoo noku kundafanwa kombinga yoimbuluma oyo yeli teela moshitukulwa, nonghee ya kwata oshiwana. Auanga okwa weda po yoo kutya oshiwana nasho otashi ka pewa omhito okuninga omawedelepo nghee sha hala opolifi i longe mokukondjifa oimbuluma.

LEAVE A REPLY

Please enter your comment!
Please enter your name here