Otto a fiya ko ovatekulu 77

0
428

OMUTOOLINGHUNDANA

OMULONGA – Omukulupe Otto Ndevahoma oo a pakwa oshivike shadja ko okwa fiya ko oshiwana shoutekulu 77. Ndevahoma okwa xulifa oweenda waye pehovelo lohani ei moshipangelo shepangelo mEenhana moshitukulwa shaHangwena konima youyehame.

Otto okwa fiya ko omufiyekadi Selma, omona umwe mokati kavakwao 12 okwa xulifa. Ovatekulu ove li 77 novatekulululwa vatatu. Nakufya ou okwa dalwa muFebuluali, 1927, nokwa pakwa pOmulonga moshitukulwa osho tuu osho.

Pandjokonona, nakufya Ndevahoma okwa dalelwa kOshandi moshikandjohoololo shaNdobe moshitukulwa Ohangwena, xe oSakaria Tulyaameni Ndevahoma na ina Priskila Shilongo ou a xulifa manga Otto okaana kaniingholi, osha etifa opo a ka tekulwe kuxekulu Joel Shilongo kEdundja.

Otto eshi a kula okwa kala omufita woimuna ya xekulu Shilongo fiyo a ka longa oushimba.Eshi a longa sha wana Otto okwa hombola 1956 naSelma Haimbodi va dika naye eumbo momukunda Oshimhumu. Modula 1989 Otto a tembukila kOmulonga waxe Sakaria shaNdevahoma. Oule weedula 28 a kala mOmulonga okwa eta po eyooloko li iwetikile moilonga yomake, epya eumbo, eyakulo loshiwana momukunda, okwa yakula vahapu nomeongalo onghee okwa li a talika oye omuumbati womitengi doshiwana molwonghenda, ombili, onheni nelididimiko laye.
Ovapopi va yooloka ova koleka oukwatya waye muwa nowa pumba.Ounghundi waOtto owa tameka eshi a dengwa nomonamati Issaskar kovakwaita vaSouth Afika loukoloni nowa enda tau kulu pefimbo leedula doukulupe.

Okwa etwa moshipangelo shepangelo shaEenhana omo a nangekwa omafiku manini, nomo a xulifa oweenda waye. Kuxe Sakaria, ova dalelwe vaheyali, vatatu vomuvo ova tetekela nale.

LEAVE A REPLY

Please enter your comment!
Please enter your name here