Oyendji otaya tungilwa omagumbo moHelao Nafidi

0
69

MARIA NAMUPALA

HELAO NAFIDI – Elelo lyondoolopa yaHelao Nafidi olya yamukula epulo lyUuministeli womahumithokomeho gondoolopa osho wo gomikunda, omolweigidho lyokugandja omagumbo kondando ohwepo kaakalimo yomondoolopa ndjoka.

Eigidho ndyoka olyali lya ningwa kuMinista Sophia Shaningwa omasiku ga ziko, nelelo olya kuthako oongaku nziya nopethimbo ndika olyi ipyakidhila nokutunga omagumbo 70, gondando ohwepo.

Meya gondoolopa Eliaser Nghipangelwa okwa lombwele Kundana oshiwike shika kutya omagumbo ngoka goondunda mbali kehe limwe otaga ka landithwa konyala komwaalu gu li pokati kooN$180 000-190 000.

Nghipangelwa ta ti omagumbo 50 gomwaangoka otaga tungwa kOmafo osho wo Engela, omanga 20 taga tungwa komalukalwa gondoolopa yaHangwena. Elelo lyondoolopa olya pungula oshimaliwa tashi ihilile poomiliona N$11 dhi longithwe mopoloyeka yomagumbo.

“Omagumbo 24 gomwaangoka otaga tungwa nale notwi inekela kutya otaga kala ga pwa okutungwa ngaashi twa manitha omatala giipindi omape ngoka taga adhika komalukalwa gOshikango, notu wete ayihe moku yambulapo ondoolopa otayi ende nawa,” Nghipangelwa a koleke.
Elelo lyondoolopa olya thaaneka noku ulika omahala gaali mOshikango, mpoka aakalimo yokomalukalwa gOkatwitwi taya ka pewa omahala ya vule okutunga omagumbo gawo. Oyendji kolukalwa hoka ohaya zi miipelekai nehala otali monika lyaana uundjolowele.

Ta ti aakalimo yaahoka oyendji oya longitha omagumbo gawo ngoka giipeleki ongoongeshefa dhawo, nokwa yelitha kutya kashina egameno lyasha moonkalamwenyo dhawo, naashino osha thiminike elelo lyondoolopa li gandje omahala nokutunga omagumbo gondando tayi vulika ku kehe.

“Otwa hala nokuhalelela okwoopaleka olukalwa lwOkatwitwi molwaashoka oluli monkalo ombwinayi noyaana uundjolowele osho wo egameno, aakwashigwana yetu ya kale wo yeli monkalo ya andjuka yo yena omalukalwa gawo yoyene,” Nghipangelwa a uvaneke.

Ta ti olukanda ndoka olo lumwe halu monithwa iihuna komeya gefundja uuna kuna omuloka omwaanawa, nolundji aakalimo yaahoka ohaya tulululwa komahala galwe. Nghipangelwa okwa ti elelo lyondoolopa olya hala okugandja omalukalwa nokukandulapo onkalo yokwaahena omagumbo kaakwashigwana ayehe yo taya futu oshishona.

LEAVE A REPLY

Please enter your comment!
Please enter your name here