Taya tsakaneke epangelo ondjilakati

0
131

MARIA NAMUPALA

OMANDONGO – Aakalimo yomomikunda dha yooloka moshikandjohogololo Onayena otaya longo nuudhiginini mokutsakaneka epangelo ondjilakati. Aakwashigwana oyi iyamba okutunga po okapangelogona momukunda Omandongo.

Gumwe gomaakwatelikomeho yetungo lyokapangelo nokuli woo omukalelipo gokakomitiye hoka ke lile po omathaneko gehumokomeho Erastus Namakumbu, okwa yelitha kutya oyali ya ningi oshigongi muJanuali nuumvo mono ya kundathana iitsa ya yooloka omolwomahumokomeho momikunda ndhoka. “Shimwe shomiikundathanwa yetu oshali okuya pamwe, tse tu wape okuthikamitha po okapangelogona mono tamu kala tamu gandjwa omayakulo guunamiti kaavu, ko ku tetulwe oondjila kwaamboka ihaaya vulu okwaadha kokapangelo kOnayena,” Namakumbu ta ti.

Omikunda ndhoka dha kutha ombinga ongaashi Omandongo gogene moka omo tamu adhika okapangelogona hoka, Onambeke, Okangili, Onanyege, Uushinga nEmono. Aakalimo yomomikunda ndhoka oya gongele po okashona kawo hoka ya tamekitha netungo lyawo muFebuluali , konima yoshigongi moka mwa ningwa omathaneko.

Namakumbu okwa ti ehala ndyoka opo hapu gandja omayakulo guunamiti komwedhi, naaluhe aakwashigwana ohaya gongala momwaalu omunene. “Omolwa eitulemo lyaakwashigwana osho shimwe shoka shetu thiminike tu etepo omanenedhiladhilo ngoka, yo aakwashigwana taya kala haya ende oondjila oofupi, ko okapangelo hano otaka adhika pondingandinga yomikunda ndhoka,” Ta gwedha po. Pehala mpoka nonande hapu ningilwa omayakulo guunamiti komwedhi, oga kala owala haga ningilwa metala lyiipeleki naakwashigwana pamwe newiliko lyetungo oya mono shoopala opo ya tunge po, lyo tali ningwa ehala lyokugandja omayakulo ga kehe siku ongokapangelogona.

Okwa tsikileko ta ti etungo ndyoka olina oondunda ndatu nopwa thanekwa pu kale aapangi yatatu (3), taya gandja omayakulo ga kehe siku. Ta ti okwa tegelelwa aavu ayehe ya kale taya mono omayakulo mpoka uuna ka patuluka pambelewa. “Aakwashigwana oya dhana onkandangala mokuthikamithapo etungo lyetu notwa hala okuyapandula omolweitulemo nomukumo gwawo, shino otwe shi ningi nelalakano opo twaa kale owala twa tegelela epangelo li tu tungile uupangelo nokutweetela omayakulo ashike tuli tsakaneke woo ondjilakati, lyo li mone kutya nani yamwe yomaakwashigwana otaya longo nuudhiginini,” Namakumbu ta ti.

Okwa pandula woo yamwe yomaanangeshefa mboka ya kwathela ngaashi Gerhard Kambonde, Joshua Amukugo, mwa kwatelwa ooyene yomikunda, na yalwe oyendji. Oya tegelela okapangelo kawo ka tulwe miilonga, go omayakulo ga andjakanekwe moshigwana noku etwa popepi nasho.

LEAVE A REPLY

Please enter your comment!
Please enter your name here