Vatatu va xupa moshiponga shomundilo

0
754

TUULIKKI ABRAHAM

Lüderitz – Ovanhu vatatu ovahupa moshiponga shomundilo, eshi efiya lohasa la topa, nonduda omo vali oya xwama.Mwene weumbo omunamido 47 Alfeus Mungongolo ota hokolola kutya, oshiponga shomundilo osho, she va ehameka komalutu, nokuhalakanifa po omaliko avo , osha holokele pexulilo lohani ya dja ko.

Mungongolo ota hokolola kutya oshiponga osha holoka eshi efiya lohasa la topa, nomundilo owa yaka, noku va xwika komalutu.
Ota ti pefimbo oshiponga sha holoka, omukulukadi waye ina hangika mo meumbo, okwa hangika eli koilonga. Meumbo ova hangika mo ashike nokamona keehani hetatu, osho yo Maria Nghitoto omunamido 27, oo hafile okanona oshisho.

Mungongolo ota hokolola kutya omundilo owa dilila koshivelo shonduda oko haku telekelwa. Ta ti Ngitoto okwa hangika e li pyakidila nokuviyauka, naashi ohasa ya topa omundilo owa kwata diva kokwooko kwaye kwokolulyo, nomomutwe. Mungongolo ota ti yee okwa hangika a nangala, naashi a uda Nghitoto a kuwa, okwa nhuka mo monduda, eshi e ke uya omundilo owa yaka nale.

Eshi eli pondje okwa dimbuluka kutya okamona keehani dili hetatu omo keli mondunda, Mungongolo okwa shuna mo nokuvakula mo okamona oko nako ka vavuka komundilo oo wa kwata oikutu yaye. Ashike Mungongolo yeemwene okwa pya lela kokwooko kwokolulyo nokombunda kombinga yokolulyo, yee okwa vavuka yo kolupanda lokolulyo.
Mungongolo, oo iha longo pefimbo eli, ota hokolola kutya omukulukadi wae oye aeke ha longo.Okwa ti omaliko avo aeshe, noikulya oya halakanifwa po sheke komundilo.

Ota tumbula nokuli omwaalu woimaliwa keemhuma, ufike N$1 600, nao wa pya ombinga, ashike eshi vaya keembanga domodoolopa, veke u shendje, ova nyamukulwa kutya, oimaliwa yapya, ohai shendjwa ashike kOmbaanga yaNamibia koWindhoek.
Onghene Mungongolo ota indile koshiwana shi va yambidide, ngaashi yeemwene ota ti okwa xupa po ashike noikutu oyo ili kolutu.

LEAVE A REPLY

Please enter your comment!
Please enter your name here