Aapangi ya fala omayakulo kOneputa mesiku lyawo

0
161

MARIA NAMUPALA

ONEPUTA – Aapangi yomoshipangelo Onandjokwe oya dhimbulukwa esiku lyawo lyOpaigwana mokufala omayakulo guunamiti koshigwana shomOneputa omukunda gu li konyala ookilometa ntano lwaampoka kuumbangalantu woshipangelo shika.

Aapangi mboka oyali ya yakula mpoka, taya tala oombinzi dha londa noku gandja uuyelele wa yooloka kwaamboka yali ya gongala pendiki ndyoka. Gumwe gwomaapangi mboka Otilie Ikeakanam okwa yelitha kutya nuumvo oya tokola ya dhane esiku lyawo pamukalo gwa yooloka, yo taya gandja woo uuyelele kaanona mboka oyo aaleli yokomongula.

Aanamukunda mboka metyapulo lyesiku lyaapangi oyali wo ya faalelwa uushike pendje wo, yo ya tyapule pamwe naapangi mesiku lyawo. Ikeakanam ta ti otaya lalakanene okufala omayakulo koshigwana, sho osho sheya kutha momutumba ya tyapule esiku ndika naaNeputa.

Ngoka wo ali a popitha aapangi mesiku ndyoka okwe ya dhimbulutha kutya oyo omeho gaanuuvu, ete ya kumike aluhe ya gandje omayakulo taga hokitha yo taya panga aavu nombili no nenyanyu. Okwa kumike wo aapangwa nayo ya kale aluhe haya simaneke aapangi yo taya iyutha noku landula omalombwelo ngoka taya pewa kaapangi yawo. Okwa ti nonande aapangi ya taalelwa komashongo ogendji ga yooloka, otaya longo ngaashi taya vulu oku gandja omayakulo guunamiti kwaamboka ye ga pumbwa, yo ya kwashilipaleke kutya uuyelele wuundjolowele owa thika kwaamboka ye wu pumbwa. Okwa ti esiku ndika olya tameke okudhimbulukiwa sho, ehangano lyUundjolowele mUuyuni lya mono po oomwaka ndhoka dha pumbwa okuthitikwa opo ku hwepopekwe onkalo yuukalinawa muuyuni.

Ta ti oshikondo shuundjolowele moshilongo otashi lalakanene okudheula aapangi naaniilonga yuundjolowele ya pyokoka nawa, okukala niilongitho yopaundjolowele yondondo ombwanawa noyo ngushu, iikwathitho yi li pamuthika omwaanawa nosho wo aaleli naakomeho ya dheulwa nawa noye na uunongo moshimpungu shika.

Esiku ndika ohali dhanwa muuyuni auhe momasiku 12 gomwedhi nguka. Esiku ndino olya totwa po komupangi omukulu Florence Nightingale, ngoka oye omukokoli gwoshilonga shuupangi muuyuni.

LEAVE A REPLY

Please enter your comment!
Please enter your name here