Eameno ola fimana li dule ekanifo leemwenyo

0
55

Komutoolinghundana

ONGWEDIVA – Okudja petameko lomudo fiyo ohani eyi, ovalongifi voitauwa kolupadi moshitukulwa shaShana ve li 23 ova lyatwa komatuwa nokufya.

Ouyelele wa tya ngaha owa yandjwa komunambelewa woshitukulwa shomapukululo mehangano loMotor Vehicle Accident Fund – MVA Fund Victoria Amutenya, oo a ti kutya eameno ola fimana lidule ekanifo leemwenyo.

Amutenya ta yelifa kutya, nande oshitukulwa sheyandjo lomauyelele nomapukululo moMVA Fund sha pukulula ovalongifindjila molwekanifo linene tashi kanifa momayakulo aavo va ninga oihakanwa yomeendjila ovanhu vahapu onghee ngoo tava ngwadjulwa koituwa. Kakele kaavo va fya pakulyatwa, moule weehani da tongwa moshitukulwa shaShana omwa holoka oiponga 126 ya etifwa kovaendi vokolupadi, omo ovanhu va li tava ende kolupadi 207 va mona oiponga.Oshinakuwanifwa shelongifo nawa loitauwa oshi li meke loNaitional Road Safety Council okutula omadidiliko meendjila nokulonga oshiwana, ashike omolwoiponga eshi ya tana unene ehangano loMVA Fund ola didilika ekanifo linene lelongifo loshimaliwa mokupaka ovafi moiponga yomatuwa, okuyakulifa pauhaku kwaavo va ninga oihakanwa moiponga yomatuwa, nokuyakula ovafiwa po moiponga yomatuwa onghee ekanifo ola uka komesho.Amutenya ta twikile ko kutya oNational Road Safety Council oi na oshilonga sheyandjo lomapukululo kovalongifindjila mwa kwatelwa ounona veefikola ovo hava kwatele eengudu davakwao komesho metauluko leendjila okuya nokudja keefikola, oye va pa oudjafa hava vilima, noya tula po omadididliko meendjila opo hapa pitilwa kovaendi vokolupadi osho yo omadididiliko okushunifa onhapo poshi opo ovashingi va yandje omhito kovaendi kolupadi va tauluke eendjila.

Omunambelewa woMVA Fund okwa holola eipulo lehangano omolwomwaalu woiponga ihapu mefimbo lixupi nekanifo linene kehangano nokoshiwana, ta ti ova enda keefikola dihapu okupukulula ounona kombinga yefimano lomadidiliko omoitauwa, ta pula ovadali navo va pukulule ounona va shiive, koneke nokuluufa komadidiliko omoitauwa. Moshitukulwa shaShana omuna eenhele domataulukilo ngaashi pofikola yaKandjengedi, Oshakati West, Okatana Primary nopuAkuna ashike nande pa tulwa omadidiliko pomataulukilo ngaashi moshitauwa shopokati kOshakati nOngwediva opolifi ohai kwafele ounona va tauluke oshitauwa omolwovashingi iha ve luufa komhango.

Amutenya ta weda po kutya,nande ovashingi vomatuwa va pulwa va yandje omhito kovaendi vokolupadi, oiponga imwe oya etifwa kovaendi vokolupadi ihava tale omadidiliko nokeameno lavo, nokuuda ko oufemba welongifo londjila. Ota kumaida ovaendi kolupadi voufiku va djale oikutu yomaluvala a twa opo va dule okumonika.

LEAVE A REPLY

Please enter your comment!
Please enter your name here