Endabi oshike?

0
162

Omukifi woRabies ohaku tiwa Endabi mOshiwambo. Oshinamwenyo shina endabi ohaku tiwa yoo oshina eemwengu.
Rabie ovirus ile ombuto yorabie ohai kwata uuluvi noshoyo omwoongo nomifipa movanhu noshoyo moinamwenyo ngaashi eembwa noumbishi. Nonande omukifi ou ohau dulu ku keelelwa, onghee ngoo taku lopotwa ovanhu noinamwenyo ina endabi. Omukifi ou omwii nowa nyika oshiponga. Otwa pumbwa oku kundafana kombinga yawo. Omukifi ou owa lopotwa moilongo konyala ayishe mounyuni, mwa kwatelwa yoo nomoNamibia. Ngee ombuto eyi ya kwata omunhu ile oshinamwenyo, kapena ouhaku, notashi xulile ashike mefyo. Nande moshilongo shetu muna oinamwenyo ihapu hai kwatwa kombuto eyi, apa ohatu denge omufindo ile ohatu popi unene kombinga yeembwa noumbishi, shaashi oyo unene oinamwenyo tuna momaumbo, nohatu i tekula.
Eembwa ohadi kwatwa ngahelipi komukifi ou weemwengu?

Oshinamwenyo otashi dulu ku kwatwa kendabi ngee sha lika kushikwao shina omukifi ou. Otashi dulika yoo oshinamwenyo shi kwatwe ngee sha nyaywa ile omayeye aasho shi na omukifi eya mekwatafano noshipute.
Omadidiliko elipi taa ulike kutya oshinamwenyo oshina endabi?

Petameko, ombwa ya kwatwa kendabi otai ulike elunduluko lakula momikalo dayo ngaashi: oku tondoka, oku kala ya hala kulyana nosho yoo okuya oshidiidii. Ombwa i na endabi otai dulu ku kala tai li ashike keshe eshi shi li puyo, kutya nee oshinamwenyo shikwao ile omunhu ile oshiti. Ombwa ei ya kala ihole ovanhu otai tameke i yele ovanhu, omanga ombwa oyo hai kala kokule novanhu otai tameke tai lunduluka notai li xu movanhu unene. Oshinamwenyo shi na endabi oha shi tameke yoo tashi yeya unene sha pitilila.

Eshi omukifi tau twikile, oshinamwenyo shina endabi otashi tameke ina shi hala oku kumwa nandenande, ina shi hala ouyelele ile omaweelelo. Otashi tameke shi hole poima pwa laula pehena ouyelele, notashi tameke oku lya oinima yongaho ngaashi eeplastica, oiti nosho tuu. Omifipa eshi ta di hangika kombuto ei, oshinamwenyo otashi tameke oku yeya unene, nokanya itake li nyenge vali nawa. Eshi omukifi tau twikile omifipa otadi ende nee tadi pu eenghono, noshinamwenyo otashi tameke okuli denga po noku enda inaashi ukilila. Ita shi li vali, kashina vali eenghono fiyo ota shi fi.

Ohapa piti efimbo lifike peni ngee oshinamwenyo sha kwatwa komukifi wendabi opo shi tameke oku ulika omadidliko?
Ombuto ei ohai kala ili molutu oule woivike ivali fiyo ihetatu lwaapo, omanga omadidiliko inaa monika. Ashike peemhito dimwe otashi dulika omadidiliko yoo e uye kuyele.

Oinamwenyo ilipi tai dulu ku kwatwa komukifi ou?
Eembwa ile oumbishi ovo inaa va tunhilwa voo tava endaenda va dja mo momaumbo, otava dulu oku pewa ombuto ei koinamwenyo oyo i na ombuto oyo.

Endabi ohali kolekwa ngahelipi? (diagnosis)
Kapena naanaa omukalo umwe woku koleka kutya oshinamwenyo oshina endabi, uheshi oku konaakona ouluvi. Osho nee uwete hatu kumaidwa kutya omutwe woshinamwenyo ile oshinamwenyo nashi twalwe koshipangelo shoinamwenyo ngee sha dipawa. Ndokotola woinamwenyo oha dulu yoo oku konaakona omikalo doshinamwenyo oule womafiku onhumba opo a tale nhumbi tashi li humbata.
Endabi ohali hakulwa tuu?

Kapena epango lomukifi ou ngee omadidiliko a tameke. Oshinamwenyo ngee sha kwatwa komadidiliko orabie, oshina ku dipawa opo shi ha tandavelife ombuto ei yendabi. Ngee osha nyika oshiponga oku shi dipaa, oshiwa ku ifanwe ovanambelewa vokoipangelo yoinamwenyo opo ve uye ve shi dipaye. Ngee sha dipawa, nashi twalwe koshipangelo shoinamwenyo. Ovanhu ava tava ungaunga noshinamwenyo shina omadidiliko aa ovena ku kala veli amena opo vaha like koshinamwenyo eshi.
Ombuto ei yendabi oina ku keelelwa ngahelipi?

Ombwa yoye ile okambishi koye naka kale haka tunhilwa. Fika poshi pangelo shoinamwenyo eshi shili popepi naave opo u mone ouyelele. Oinamwenyo yetu yomomaumbo nai kale hai kala ya idililwa momaumbo. Ngee oya kala ha i kala pondje opena omhito yo ku lika koinamwenyo ina endabi, yoo ikwatwe nee kombuto ei.

Ngee owa didilika pamwe kutya oshinamwenyo shoye osha lika koshinamwenyo shina omadidiliko endabi, oshiwa u twale oshinamwenyo shoye ku ndokotola woinamwenyo opo shi ka vendwe. Eshi osha pumbiwa okuningwa, nande oshinamwenyo shoye osha vendwa nale. Ashike ngee oshinamwenyo shoye otashi li humbata nai, nosha hala oku lyana, ino kondjifa shoo shi ku lye. Konga ekwafo.
Ovanhu ohava kwatwa ngahelipi kombuto ei yendabi?

Omunhu ota kwatwa kombuto ei yendabi pamukalo naanaa ngaashi oinamwenyo hai kwatwa. Ngee omunhu okwa lika ile a nyaywa koshinamwenyo shina orabie, nena ota kwatwa. Ngee omunhu okuna oshipute ndele tashi yeyelwa ile sha lafwa kombwa ile kokambishi kena orabie, nena ota dulu oku kwatwa. Oku lafwa komulungu kombwa ile kokambishi kena ombuto ei otashi dulu yoo oku eta etandavelo lombuto eyi. Omadidiliko ombuto eyi omunhu okwa faafana naanaa naa a tumbulwa pombada, moinamwenyo. Osho nee hatu mono omunhu taku ti okuna eemwengu noteli humbata afa ombwa ina eemwengu. Ngee oto lande oshinamwenyo shoye, nashi kale shina ombaapila yetunhilo. Ino toola oshinamwenyo shihe na mwene. Oshiwa ushi twale tete shi ka konaakonwe manga inoo shi twala meumbo loye.
Ouna ku ninga ngahelipi ngee owa lika, ile omukwanedimo woye a lika ile anyaywa kombwa ile kokambishi.

Opena eyooloko pokati komunhu a lika kombwa yomeumbo, nongee a lika kombwa yokomaumbo ihe shiivike. Ngee ombwa oyomeumbo, epulo lina oku pulwa ololo kutya, ombwa oina omaliumbato taa limbilike? ile pamwe omunhu okwe i shinda opo i mu lye? Epulo likwao lina oku nyamukulwa oleli ngee ombwa oya tunhilwa tuu, nonaini?

Ombwa yomeumbo hai tunhilwa, no ita i limbilike omunhu, ya lya momunhu ngee ei lyata ile eyi shinda, omhito yoku kala ina ombuto yorabie oinini neenghono. Ashike ngee opena elimbililo, oshixwepo uye kundokotola woye. Ngee to i kundokotola ile koshipangelo, twaalela ombapila yetunhilo lombwa. Ngee ombwa ina i tunhilwa nena inda ashike koshipangelo ile kundokotola woye. Ombwa ngee kai shiivike, nena omunhu okuna ku ya koshipangelo ile kundokotola waye. Ngee otai dulu oku monika ndele ta i twalwa koshipangelo shoinamwenyo, otashi kala shiwa. Ngee oya faduka po ndele kai wetike nena ndokotola woye okuna oku twikila nepango onga omunhu a lika kombwa ina ombuto ei.

Koshipangelo ndokotola ile omupangi ota tale apa pa like. Ngee opena oshipute nena oshina oku wapalekwa noku kala tashi mangululwa opo shi ha kwatwe keembakiteli. Ndokotola ota ufa nee opo omunhu a kale ta pewa eevenda doku keelela ombuto eyi iha ye komesho.
Didilika nawa: Otuna oku twa po omufindo poshitwa eshi shaashi omukifi ou ihau hakulwa. Ngee wa kwata omunhu ndele ta tameke ena omadidiliko, evatelo otali kala linini neenghono, na omunhu ota fi. Onghee ovapangi neendokotola ohave li ameke kombinga yoku hakula shaashi omukifi ou ihau pangwa ngee wa tameke molutu lomunhu.

Ouna ku ninga ngahelipi ngee wa mono oshinamwenyo shina omadidiliko ombuto eyi?
Ino kendabala oku kwata oshinamwenyo osho. Otashi dulu oku lyana shoo shi tandaveleke ombuto yorabie. Ngee oshinamwenyo kashi shiivike, pata omuvelo weumbo. Konga ekwafo kovanambelewa ndele to lopota kutya opena omalinyengo eli ngaho. Ngee oshinamwenyo oshomeumbo, ndele oshina omadidiliko ombuto ei, osha nyika oshiponga lela. Ngee opena ovanhu tava dulu kushi dipaya, nena oshiwa shi dipawe. Ashike kotoka nee opo shi ha monife omunhu oshiponga. Ngee kapena omhito ili ngaho oshihwepo u konge ekwafo. Ngee owa hange oshinamwenyo she lifila kotoka ino shi kwata neenyala dongaho, unene tuu ngee oshali ta shi limbilike. Ngee oto nyengwa, konga ekwafo kovanambelewa voinamwenyo. Keelela oinamwenyo yoye yomeumbo iha lwife oshinamwenyo tashi limbilike. Otai dulu oku kwatwa kombuto ei.

LEAVE A REPLY

Please enter your comment!
Please enter your name here