Oifitukuti otai dulu kushingwa

0
74

Komutoolinghundana

OHANGWENA – Oifitukuti ya ninga omafiku tai piyaaneke oshiwana eshi ya puma moshikunino nokulihanena oitukulwa Oshikoto, Ohangwena nOmusati otai dulu kushingwa mokati kovanhu kovanambelewa vombelewa youshitwe. Edi, oda tumbulwa komunambelewa omukwateli komesho wombelewa yomidingonoko nefiloshisho loinamwenyo Rehabeam Erkkie.

Erkkie ta ti, eshi kwa lokwa nawa neudo eendjaba mbali dotete, oda tavakana oshitukulwa shaShikoto noshaHangwena okudja eemwedi mbali da dja ko, noivike ya dja ko okwa didilikwa vali eendjaba dikwao.

Oifitukuti ei oya ningila oshiwana oushada ya lya omatanga noilya momapya nokutyanghaula oikunwa momapya omo shitukulwa shaHangwena moikandjohoololo shaKongo, shaMundaungilo nomoshikandjohoololo shaShikunde. Elinyengo moikandjohoololo ei ola kolekwa keekansela moikandjohoololo ei, Festus Ikanda kOmundaungilo, Lonia Shinana-Kaishungu naKansela Ndadi koshikandjohoololo shaKongo moshitukulwa shaHangwena.

Molwomuloka woneudo u li nawa, Erkkie ota ti, oifitukuti oya ehena mokati kovanhu molwaashi oikulya nomeva peenhele dihapu pe na ovanhu.

Eendjaba dihapu oda piyaaneka ovanamapya moshitukulwa shaMusati, osho sha lokwa tete nokutalama omeva mahapu e dule oshitukulwa shaKunene, onghee eendjaba dihapu oda taukila oko no da ningila oushada omapya mahapu kuAmarika moshitukulwa shaMusati.
Omunambelewa wombelewa youshitwe okwa holola kutya, ovanailonga vombelewa yavo ove li pyakidila nokushinga oifitukuti mokati koshiwana .

Oifitukuti ohai shingwa oufiku, onghee oshiwana otashi londwelwa shiha endaende oufiku moitukulwa mwa tongwa oifitukuti, opo shi henuke elidengo mumwe noifitukuti.

Omunambelewa woushitwe ta weda ko ta ti, ondjaba ihai dimbwa opo ya enda konima yeedula 100, onghee eendjaba ohadi kundafana na dikwao nande odi lyaafane oshinano shee kilometa omilongo-30.

Onghee ta kumaida oshiwana shi ha piyaaneke oifitukuti ngaashi sha ningwa pOupili moshitukullwa shaHangwena oshiwana she ya kukalela eendjaba tadi li epya.

Erkkie ta weda po kutya, ombelewa yomidingonoko, oya kundana eenghoshi da lya po oimuna koshitukulwa shaMusati, ta pula oshiwana shi fike keembelewa deekansela odo hadi kwatafana novanambelewa vetonatelo loushitwe okuninga ekonaakono ku talike apa pe fike enyonauno loikunwa.

Omunambelewa wombelewa youshitwe okwa kumaida oshiwana shi lopote elinyengo loshifitukuti keshe tai monika mokati kovanhu, ta ti epangelo ole lilongekid kupwilikina omafaneko oshiwana osho tashi tanguna oifitukuti.
Ta pula oshiwana shi dengele eekansela odo tadi dulu kukwatafana novanambelewa voushitwe mwaashi.

LEAVE A REPLY

Please enter your comment!
Please enter your name here