Omahilathano ge eta uutondwe nevundakano mOndonga

0
2255

MARIA NAMUPALA

ONDANGWA – Omolwoshikumungu shomananathano nomahilathano shi iteyela mOndonga, ongundu onene yaakwashigwana yaamoka ya gongele iimaliwa anuwa ya tululule mo oshipotha shompangu shoka yakanitha, noku pa omunyekadhu gomukwaniilwa Immanuel Kauluma Elifa opo anuwa a thige po Ondonga.

Aakalimo yomondonga mbaka oya gongalele poshinyanga shiigongi pOluno Olyomakaya ga piti, no ya kundathana kombinga yetokolo lyompangu ndyoka lya ningilwe oshiwike sha zi ko.

Oshigongi shika osha ningwa omolwomalenga gahetatu ngoka ga kuthwa muulenga pakathimbo omasiku ga zi ko. Ongundu yaakwashigwana oya holoka yu ulike uukwawo wanankali pamwe nomalenga ngoka. Elenga enene moshikandjo Ondangwa John Walenga okwa li a tseyithile
oshigongi kutya oshipotha shawo shoka ya li ya patulula osha ekelwahi, no inaku ku gandjwa etompelo kutya omolwashike. Omupanguli Shafimana Ueitele metokolo lye lyOmpangu yOpombanda okwa ti oshipotha osha ekelwahi molwashoka ngoka e shi fala kOmpangu ina pewa oonkondo kEwiliko lyopamuthigululwakalo gwaNdonga opo eshi ninge noshikwawo mboka ye shi fala kompangu ka ye na uuthemba oku shi ninga molwashoka yo oya kuthwa mo muulenga. Ohofa oya ti wo kutya Elelo lyOndonga ka lya li lya gongala noku ninga etokolo opo oshikumungu shoka shi falwe kOmpangu yopombanda.

Meindilo lyawo mohofa yopombanda omalenga ngoka ga tulwa pevi oga li ga pula ohofa opo yi gandje elombwelo opo go ga kale nemanguluko okuthika pOmukwaniilwa uuna sha pumbiwa, noshikwawo oga li wo ga indile opo ohofa yi gandje elombwelo opo Omukwaniilwa anuwa a konakonwe kaanawino yuunamiti osho wo mboka yopamadhiladhilo ku talike ngele okuli tuu muundjolowele no ta vulu okuninga omatokolo nenge pamwe uundjolowele we wopandunge owa nkundipala.

Walenga okwa tseyithile oshigongi shika sha landula shoka sha ningilwe muApiilili, shoka sha li sha indile omunyekadhi goshilongo Secilia Elifas a hulithe po okwi idhopa miinyangadhalwa nomiinima yElelo lyOndonga.

Okwa tseyithile woo oshigongi kutya natango otaya tulululamo eindilo lyoshipotha shawo, itaya shuna nande monima molwaaashoka otaya kondjele nokulalakanena oshili ndjoka ihaayi holama. Kashona Ka Malulu, Vilho Kamanya, Fillemon Nambili oyo yamwe yomomalenga ngoka ga kuthwa miilonga manga pakathimbo no gali ga holoka poshigongi shoka.

Aakwashigongi oyali ya holola omaiyuvo gawo, mono Pendapala Nakathingo a popi nokwa li a gandja omasiku gaheyali opo omalenga ngoka gahetatu ga kale ga galulilwa miilonga nongele hasho otaya ka kutha omatokolo kuyo yene molwaashoka oye wete etulwopevi lyago inaa li enda pamulandu no ka li li puuyuuki. Ina ulika kutya omatokolo ngoka taya ka kutha ogeni nenge oga tya ngiini.
Oya lundile omunyekadhi kutya oye e eta etopoko anuwa ndyoka lyi iteyela mokati kaaNdonga, no ye mu pe omasiku 30 a kale a za mo megumbo lyUuwa molwaashoka anuwa okwa zimina kutya oye te eta omavundakano mOndonga.

Nonando oshigongi shika sha li shina oku ningilwa poombelewa oonkulu dhelelo lyaNdonga, otwa kundana kutya esiku ndyoka poombelewa ndhoka opwa li pu udha aanambelewa yokutonatela omaliko, no ya li ya kondeka ehala ndyoka nelalakano kaapu ningilwe oshigongi.
Gumwe gwomaakokele ngoka woo naye a kuthombinga miikundathanwa kuku Alma Gabriel okwa ti oshinima shi iteyela melelo lyaNdonga oshinene nosha pumbwa oku katukilwa onkatu yomeendelelo.

‘Oshinima shuutondwe osheeta etopoko mOndonga naantu kaye nawe ombili oshoka otaya kondjithathana, otuna aapiyaganeki oyendji no tu wete kutya ngaashingeyi Oondonga odha ninga mbali, onkene tse otuli konima yomalenga getu ngaka ga tidhwa shaali pauyuuki, notwa hala ombili yi pangele,” a ti ngaaka.

Akwashigwana oya galikana omunyekadhi ki idhope mo we miinima yelelo lyOndonga, ye ti ikaleke kokule, oya hala woo emanguluko okuya kOmukwaniilwa, noya hala woo ombaapila ndhoka dha kala tadhi pitithwa ta ku ti odha za kOmukwaniilwa dhi yelekwe nawa.

LEAVE A REPLY

Please enter your comment!
Please enter your name here