Omauliko gaTonzo

0
35

SABINA ELAGO

WINDHOEK- Aakiintu osho wo onkalo yombepo oya simanekwa okupitila momauliko giihongomwa niilonga yuunkulungu yomathano yaAlpheus Mvula, mbyoka tayi tsikile okuulikwa pendiki lyiikwamithigululwakalo lyoFranco-Namibia Cultural Centre (FNCC)moVenduka.

Omauliko taga ithanwa Tonzo otaga ulike olutu lwomuntu mokulongitha omamanya okuholola po omutholomo molupe lwoshihongomwa shino-ombinga dhi thike pamwe. Momauliko ngaka Mvula okwa longitha omamanya gomoshilongo ngaashi ogranite nomarble ontokele na galwe nomathano ngoka a honga oga tala unene komutungilo gwomukiintu osho wo iipala yawo.

Okwa honga wo omathano gamwe ngaashi moka a longitha oongombe oontsezi nenge oonzinzi mokupopya niilongithwanima mbyoka a hongo nohamala osho wo ochisela. Mvula okwa ti iihongomwa mbyoka tu ulike oya yoolokathana noyi na omanenedhiladhilo gi ili ngaashi omathano gontulo, ongombe osho wo aantu.

“Onda konene olutu unene ndoka lwomukiintu okuholola eyambidhidho lyandje koonkambadhala dhokunkondopeka aakiintu,” osho a ti.
Mvula okwa ti omandhindhiliko ngaka oge na elalakano oku gandja ongushu kaakiintu nosho wo kelunduluko lyonkalo yombepo.

“Onda tholoma po iihongomwa mbika nomukalo gokuholola shoka tandi dhiladhiIa nde shi ningi sho nda longitha omathano ga hongwa momamanya,” osho a ti. Okwa ti ishewe olwaala oluluudhe nolutokele momathano ngaka olwa kalela po etegameno osho wo einekelo kaantu okuya pamwe osho woo iilonga yuunkulungu mbyoka ya kalela po elunduluko monkalo yOmbepo.

Iinima mbika oye shi ningi oshipu kungame okugandja etumwalaka koshigwana nosho wo okuulika kutya aakiintu moshilongo shetu oyena ongushu ye vule oongombe nokawe mbyoka ya simana unene natango momeho gaantu yamwe.

Onkene omathano gandje gaakiintu osho wo oonzinzi otaga ulike ekwatathano nongushu yaakiintu moshigwana nonkene ngame tandi ya yambidhidha.,” osho Mvula a holola . Omauliko ngaka otaga kala nokumonika po FNCC sigo omomasiku gahetatu gaJuni nuumvo.

LEAVE A REPLY

Please enter your comment!
Please enter your name here