Omudhimba gwa ningi omumvo aguhe mokila

0
1362

LOIDE JASON

ONGWEDIVA-Uuministeli wUukalinawa moshitopolwa shaShikoto otawu kongo aapambele yaJohannes Sava ya ninge omakwatathano noshipangelo opo ya tale nokudhimbulula ngele olutu ndoka lwa kala mokila uule womvula ayihe olwe.
Shika osha li sha tseyithwa kuEster Nefungo ngoka elile po ombelewa yuukalinawa moshitopolwa shoka.

Nefungo okwa ti omulumentu nguka okwa li omuniilonga kohambo yimwe moshitopolwa shoka ihe sho a hulitha kape na nande ogumwe e na uuyelele wothaathaa mboka tawu ulike kutya nguka okwa za peni naapambele ye oyo oolye.

“Nakusa okwa li eya moshipangelo petameko lyAuguste omumvo gwa zi ko ta ehama na okwa li a hulitha.
Oku za esiku ndyoka otwa kala tatu kongo aapambele ye, mboka inaa tu mona sigo ongashingeyi.

Ihe omugandji gwiilonga komukwashigwana ngoka na ye wo ina hala oku gandja uuyelele wa gwana mboka tawu vulu okukala wa monikitha aakwawo,” Nefungo a ti ngaaka.

Oya ti kutya nakusa nguka ngashingeyi ota fekelwa Omuzemba a za koRuacana nenge koAngola okwa kala ta longo kOmutsegondjamba uule woomvula ntano ongomusita gwiikombo,.Pauyelele mboka wa gandjwa kaa kwashigwana nakusa okwali a shunithwa koRuacana kopolisi yaMuthiya molwashoka keena oombapila dhuuthemba.Okwa hokololwa wo kutya nakusa ke na nande okanona nenge omukulukadhi.

Ngashingeyi uuyelele wuli po otawu fekele kutya nakusa otashi vulika a valelwa komukunda Okahama moAngola na otaku ti ngashingeyi okwa li Jason omanga ofani ye yali Sava nokonima okwa ka lundulula eta ningi Johannes Sava Kapelema sho a yi moshipangelo.
Ihe ngashingeyi ombelewa yUukalinawa pamwe nombelewa yakansela mOmuthiya otayi kumagidha aagandji yiilonga ya kale ye shi aapambele yaniilonga yawo opo shi kale oshipu ngele pweya uudhigu.

“ Osha simana opo aaniilonga ya kale ye na uuthemba nenge yeshi aapambele ya niilonga yawo opo tu yande omikundu ngaashi nguka,” Kansela Samuel Shivute a londodha.

Shivute okwa ti aakongi yiilonga uunene mboka ya za kiilongo yopuushiinda mpoka oya pumbwa oku kala taya gandja uuyelele woshili opo shi kale oshipu okukonga oofamilia dhawo hoka ya za. Okwa ti shika kashi li mondjila oku kala omuntu ta gandja uuyelele wiifundja oshoka ngele pwa holoka omukundu ngaashi nguka oshidhigu oku mona aapambele mboka oshoka edhina ndyoka kali shiwike nawa.

Kansela okwa hokolola kutya ngashingeyi ngiika uuyelele oye wu tula miikaha yoombelewa yomukalelipo gwaAngola moNamibia. Ombelewa yomukaleliposhilongo gwAngola moNamibia ngashingeyi oyo tayi ungaunga nomukundu ngoka yo yi gandje etokolo lya hugunina ngele ya yengwa.

LEAVE A REPLY

Please enter your comment!
Please enter your name here