Oondjamba mOhangwena dha tidhilwa koAngola

0
216

MARIA NAMUPALA

ONDANGWA- Opolisi yoshilongo pamwe naanambelewa yuuministeli womidhingoloko nomatalelepo, Osoondaha oye shi pondola okushunitha koAngola oondjamba ndhoka dha yonagula nokuteyagula momikunda dhimwe moshitopolwa shaHangwena.

Omupopiliko gopolisi moshitopolwa shoka Abner Kaume Iitumba okwa koleke shika Omaandaha, ta ti aaniilonga mboka oya shunitha oondjamba hoka dha zile nonande ka sha li oshipu. Iitumba okwa ti okwali kwa lopotwa oondjamba ndatu dhiiteyele miikandjohogololo Omundaungilo, Oshikunde nOkongo, nokuyonagula omapya gaakwashigwana, nodha thigi iilikolomwa yaantu momapya ya yonaguka noonkondo.
“Oshali oshidhigu okushunitha oondjamba ndhoka koAngola konima sho dha lopotwa dhiihanena omidhingoloko ndhoka, oondjamba odha li dha nika onyati nongeyo no ka pu na ngoka ali ta vulu okuhedha popepi nadho, molwaashoka odha li dha shongwa kaakwashigwana sho taya kambadhala okudhi hedhitha kokule,” Iitumba ta ti ngaaka. Otaku hokololwa natango dha hanagulapo epya lya kansela goshikandjohogololo Oshikunde Lonia Kaishungu-Shinana Osoondaha ndjoka manga inaadhi tidhilwa koAngola. Ta ti odha yonagula wo momukunda Oupili nodha thiga oyendji pomutenya, molwashoka iilikolomwa yawo oya yonwa po.

Oondjamba odhali dhiiyaka moAngola, nodha shunwako hoka uusiku wOsoondaha twa zi, Kaishungu-Shinana ta ti nonande dha yonagula omapya otaya pandula molwaashoka inaku lopotwa nande dha lemaneka nenge dha ehameka omuntu.

Ombelewa yiithitukuti oyali ya lopota natango oonkoshi hamano dhiiyaka moshikunino shiinamwenyo mEtosha omwedhi gwa ziko, nokwiihanena iitopolwa yokonooli yoshilongo, okwali kwa lopotwa dha dhipaga oongombe komukunda Omutambomawe moshitopolwa shaMusati.
Aakwashigwana yomOmusati gwaShiningu mOngandjera etine lya ziko oyali ya ningi oonkambadhala, noya dhipagapo onkoshi ontsezi ndjoka yali noonkoshi 4 ndhoka dha lopotwa dha dhipaga oongombe odhindji komalukalwa hoka. Oonkoshi ndhoka ndatu dha hupupo inadhi monika sigo onena, notadhi kongwa okuza ehulilo shiwike lya piti. Oondjamba tadhi ihilile po-20 odha lopotwa dhiihanena momukunda Amaupa mOmusati, nodha yonagula omapya geli gahetatu lwaampoka.

LEAVE A REPLY

Please enter your comment!
Please enter your name here