Oshitopolwa sha//Karas sha pewa iimaliwa shi hulithe po uundjugo womomayemele

0
62

Mpaka otapa landula omiyalu dhontengeneko–thaneko yembo lyiimaliwa yomumvo2017/2018 ya yelekanithwa nembo lyomvo 2016/2017

Desie Heita

Windhoek- Nonando omutengenekwa-thaneko gweyokomeho moshitopolwa sha//Karas ogwa shunithwa pevi noomilina N$125, omuvo gopashimaliwa gwo2017/2018 ogwa kwatelamo natango oshimaliwa shoka tashi longithwa okutsikila komeho niilonga yehumokomeho ya simana ngaashi ehulitho po lyuundjugo womomayele.

Omutengenekothaneko gweyokomeho gwonuumvo ogwa gandja ashike iimaliwa koopoloyeka oompe dhili 33, omanga tagu tsikile nokufutila oopoloyeka adhihe ndhoka dhili nale miilonga nonando iimaliwa yaandhika oya shunithwa pevi nooperesenda 23 opo omwaalu ngoka tagu longithwa mwaandhika omimvo ndatu tadhi landula gu kale ashike gwa thikama pooN$24,2 oobilliona.

Membo lyiimaliwa lyomumvo 2017/2018 oshitopolwa shika osha pewa ooN$844,208 oomilliona, omwaalu nguka ogwa shuna pevi nooperesenda 12,9 okuyeleka nooN$969,325 oomilliona ndhoka oshitopolwa shika sha pelwe membo lyomumvo 2016/2017. Momwaalu gwiimaliwa mbyoka ya pewa oshitopolwa sha//Karas oomilliona dhooN$15 otadhi ka longithwa okuhulitha po elongitho lyomayemele ongolupe lwokwiikwathela ngele omuntu a hala okuya kondje.

Iilonga yuunamapya tawu tekelwa moshitopolwa shika oya pewa oodola oomilliona N$22 go omwaalu nguka ogwa ya pombanda noomilliona mbali okuyeleka naangoka gwa gandjelwe omvo gwayi.Lyo etsikilo mokutunga ondama moshitopolwa shoka osho wo egandjo lyomeya olya pewa ooN$407,6 oomillina omumvo gwembo lyiimaliwa ndika.

Oshitopolwa shoku gwedhela ongushu kiilongomwa yuunamapya kohi yUuministeli Wependulepo lyIikwafabulika nEyambule po lyoongeshefa dhooSME osha pewa ooN$10,6 oomilliona, omanga okutunga po omahala gokulongelwa iikwafabulika kwa pewa ooN$ 10 oomilliona, yo iilonga yokutunga po oofabulika dhiihondjomwa oya nuninwa ooN$15 oomilliona.

Omwaalu gwiimaliwa ya nuninwa okulanda evi okuza kaanafaalama yiipindi ogwa shuna pevi sigo ooN$25 oomilliona okuza pooN$100 oomilliona ndhoka dha li dha gandjwa omvogu.

Ihe iilonga yokuopaleka nawa oondjila oyi li nawa no ya kola moshitopolwa shika.Mbika oya hololwa komwaalu gwooN$ 60 oomilliona ndhoka dha nuninwa ondjila yookilometa konyala ethele limwe pokati kOranjemund na Rosh Pinah, dho ooN$25 oomilliona odhi itulilwa okulongithwa oku opalekulula nokuyumudhapo olutenda lweshina pokati kaAus naLindili.

Ope na ishewe ooN$14 oomilliona tadhi longithwa okutunga po oondjila oonshona okukwatakanitha omanongelo nuupangelogona moshitopolwa.

Oshikondo sheYokomeho momikunda niilando osha pewa iimaliwa iishona nuumvo mbyoka tashi longitha okuopaleka omahala gevi opo pu tulwe omayakulo gopamuni.Omwaalu nguka ogwa zi pooN$85 oomilliona noku shuna pevi sigo opooN$52 oomilliona. Iimaliwa mbika otayi ka longithwa okutunga po noku opaleka omahala gokutungwa moLindili noKeetmanshoop, mboka kehe gumwe ta mono oodola ooN$4 oomilliona. Koes ota pewa ooN$2 oomilliona , Bethanie ta mono ooN$3 oomilliona, Karasburg ta taamba ooN$3 oomilliona, Aroab okwa tegelela ooN$2 oomilliona ye Oranjemund ota tulilwa mo ooN$4 oomilliona.

Oshikondo shEgameno nEpopilo lyoshigwana osha thaneka okulongitha omwaalu ngoka sha longithile omvogu gwa ndambulwa sho tashi ka longitha ooN$40 oomilliona oku opaleka oosasiona dhopolisi osho wo ooN$30 oomilliona okutungila aanambelewa yasho omalukalwa.Membo lyoshimaliwa lyomumvo gwayi oshikondo osha li sha tula po ashike ooN$13,9 oomilliona okutunga oombelewa oompe nomagumbo gaapolisi poBerseba no poKarasburg.

Omutengenekothaneko gwOshikondo shEgameno okutunga ontanda yaakwiita poKeetmanshoop ogwa shuna pevi sigo opooN$4,8 oomilliona omvo nguka, okuza konyala pooN$12 oomilliona ndhoka dha li dha longithwa omvogu.

LEAVE A REPLY

Please enter your comment!
Please enter your name here