Aanangeshefa aashona otaya ka pewa omapapa

0
75

LOIDE JASON

ONGWEDIVA-Aanangeshefa aashona otaya ka mona omapapa pehulilo lyaJuni.
Mokati kaamboka taya ka pewa iishani, otamu ka kala omusindani dhingi ngoka taka talika kutya oye a longa nawa e vule ayehe.
Shika osha li sha popiwa moshingigongelo yoshimaliwa shomapapa ngoka mOngwediva ehuliloshiwike lya zi ko.

Ehangano lyaanangeshefa mbaka yopetameko haya ithanwa noshitya shimwe SME pamwe nehangano lyoNBC noshowo oshifo kundaneki shedhina Confidante oya tseyitha kutya otaku kala omapapa geli gane noshowo gaali ngoka ga gwedhwa po.

Ngashingeyi mboka taya ka kuthombinga mwaashika oya za ashike kiitopolwa yili ine yomuuninginino-mbangalantu, ashike omalongekidho ogeli metifa okutamununa ompito ndjika yi kale ya egulukila ayehe.

Omukuluntu gwehangano lyedhina Na­mibia New Age Investments (NNAI) Isaac Tjaronda okwa ti elalakano lyoshituthi shika okunkondopaleka aanangeshefa aashona opo ya koke melelo lyoongeshefa monakuyiwa.

“Oshinakugwanitha shetu oshinene okugandja ompito kaanangeshefa aashona opo ya koke, yo ya kale aahingi yehumokomeho mongeshefa kaanangeshefa aashona moshilongo,” Tjaronda a ti ngaaka.
Okwa ti edhiladhilo ndika olye ya po oshoka oya mona kutya opuna omwaka mokudhimbulula nokuyalula iilonga mbyoka ya longwa kaanangeshefa yoludhi nduka.

Okwa tsikileko a ti shika otashi ka kala woo ompito ombwaanawa moku dhimbulula aalongi nuudhiginini, omapendafule moongeshefa dhopevi noshowo aanduluki yiinima miipindi ya pyokoka nawa.
Tjaronda okwa ti konakuyiwa otaya dhilaadhila okuya po noompito odhindji dho kusindana opo aanangeshefa mbaka yakale yena ohokwe nokulonga nuudhiginini.

Oompito dhokusindana ongaashi (Best SME of the Year) Omunangeshefa-omushona dhingi gwokomumvo ndjoka tayi ka sindanwa ku ngoka ena ongeshefa ya koka mbala niilonga yeitulomo.
Ompito ndjika aagandji yiitsa otaya ka tala nkene ongeshefa ndjika ya koka mokugandja iilonga, mokushingitha noshowo mokutseyitha iipindi.

Mompito yedhina Innovative SME of the Year, (omunangeshefa omushona ngoka eya po nomalunduluko omawanawa kaa ku na we) ndjika otayi ka talika nkene ya koka mokunduluka po iilandithomwa.

Omanga ompito ndjika Best SME Employer of the Year (Omunangeshefa omushana ngoka oye eli omuyandji gwiilonga omwaanawa kamana) tayi ka tala onkalo yawo yiilonga kutya omudhingoloko gwiilonga noshowo aaniilonga oguli ngiini.
Ompito ya hugunina otayi ka tala nkele oomeme ya longa nuudhiginingi miipindi oshimaliwa shoka a mona mo noshowo ongeshefa kutya oya koka ngiini muule woomvula ndatu, edhina lyompito ndjika oyo The Woman-Owned SME of the Year (omunangeshefa omukiintu, kamana mongeshefa oshona).

Tjaronda okwa ti aagandji yiitsa oyo taya ka tokola ompito ndjoka tayi ithanwa Macro noshowo Lifetime .
Omukuluntu gwoshikondo shoonkundana noopolohalama moNBC Mennesia Muinjo okwa ti yo ongehangano hali tumu omawi mombepo otaya ka gandja ondando yili nawa kaanangeshefa mboka ngele taya pititha iipindi yawo mombepo.
Ngoloneya goshitopolwa shaShana Clemens Kashuupulwa naye oko ali koshigongi shika shoka shali sha gongele ooN$200 000 uusiku mboka.

LEAVE A REPLY

Please enter your comment!
Please enter your name here