AaNdangwa ya nyanya molwoshipangelo

0
115

MARIA NAMUPALA

ONDANGWA – Aakalimo yomOndangwa kayuuvitile ombili elundululo lyoshipangelo, shoka shali sha thanekelwa okutungwa mondoolopa ndjoka, nopethimbo ndika otaku popiwa tashi ka tungwa mOngwediva nenge mOshakati.
Metitatu lyoshiwike shika engungo enene lyaakalimo yomondoolopa yOndangwa olyali lya nyanya lyuuka koombelewa dha govena gwaShana Clemens Kashuupulwa, hoka lya gandja omukanda nyenyeto taya holola kutya oye wete taya gogwa omahoka komilungu molwelundululo lyoshipangelo.
Shika osha landula oshizemo shomutumba ngoka gwa ningwa omasiku ga zi ko mOngwediva, moka mwa tothwa mo kutya oshipangelo shoka shali sha thaanekelwa okutungwa mOndangwa itashi vulika shi tungwe we, oshoka ota pu ka tunga oshipangelo sho ndondo yi ili mOngwediva.
Omukandakemo ngoka ogwa nyolelwa omupresidente goshilongo omundohotola Hage Geingob, nombapila yenyenyeto oyuukithwa woo kUuminsteli Wuhaku nOnkalonawa, Uuministeli  wOondoolopa nOmayambulepo gOmomikunda, ombelewa yElelo lyoshitopolwa shOshana nombelewa yelelo lyondoolopa yaNdangwa.

Joni Kaneidus ngoka a lesha omukandakemo ngoka, okwa totha mo kutya otaya pula epangelo nuuministeli u tunge oshipangelo shoka mOndangwa ngaashi shali sha thaanekwa petameko nonande ondondo paife ya lunduluka.
“Ondoolopa yOndangwa oyo ya tula mo tango eindilo lyoshipangelo, notuna uuyelele kutya elelo lyondoolopa olya gandja nale iipambu yevi pu tungwe oshipangelo, “ Kaneidus ta ti.

Momukandakemo oya holoka kutya kayuuvitile ombili oshinima shoka, noye wete epangelo naawiliki yoshitopolwa shOshana yeya ekelahi, no yati ondoolopa yawo otayi yugwa omahumo komeho, yo itayi yambulwapo nuupu molwaashoka aaleli yokomeho moshitopolwa shaShana otayuundulile owala omahumokomeho kOngwediva nOshakati, noyafa ya tulwa pokakololo. Okwa thanekwa oshipangelo shika shopashitopolwa tashi kala tashi yakula aavu yaza miitopolwa ngaashi Oshana, Oshikoto, Omusati, Ohangwena, Iitopolwa iyali yaKavango oshowo Zambezi. Omanga inaa ya nyanya, Aandangwa tango oya li ya ningi oshigongi sha ningilwe pendiki lyiipindi mOndangwa. Oshigongi shika shali kwatelwa komeho kaagundjuka osha li sha kundathana iinima ya pamba omahumokomeho mondolopa yawo osho wo iikumungu mbyoka tayi inyenge muyo.
Aapopi ya yooloka oya li taya popi iitsa yawo, shono she ke eta poshitaafula kutya oye wete ondoolopa yawo tayi yugwa omahumo komeho, yo itayi yambulwa po nuupu molwaashoka aaleli yokomeho moshitopolwa shaShana otaya undulile owala omahumokomeho kOngwediva nOshakati, noye wete taya liwa oshipungo moshinima shika.

Oshigongi shoka shali mewiliko lyaPaulus Nuuyoma, aakwashigwana oya holola muukumwe kutya oyu uvithwa nayi kUuministeli wUundjolowele nOnkalonawa osho wo elelo lyoshitopolwa shaShana, sho yena omathaneko gokulundulula oshipangelo shoka sha li sha thanekelwa mondoolopa, nosha yela kutya ngashingeyi otashi vulu shi lundululilwe kOngwediva.
Omunambelewa omukuluntu melelo lyOndangwa Ismael Namgongo, omasiku ga ziko okwa yelitha kutya elelo lyondoolopa ndjoka olya gandja nale iipambu yomavi iyali (2) mo 2015, nUuministeli wUundjolowele momvula oyo tuu ndjoka owa li wa zimina, mondoolopa mu tungwe oshipangelo shopashitopolwa, ta ti omahala ngoka agehe gaali opo geli no inapu tungwa sha natango.
Aakwashigwana oya yelitha woo kutya omanga elelo lyondoolopa lya gandja nale iipambu yevi pu tungwe oshipangelo oye wete shoopala, opo ashike oshipangelo shi tungwe mOndangwa sho tashi yakula aavu kehe.

Otaya ka shanga omikanda dha wo nziya nokudhi tumina koombelewa, yo taya pula Uuministeli wu tale po nawa.
Michael Mwinga ngoka eli Omugandjimayele gwaNgoloneya oye a taamba ko omukandakemo pehala lyaNgoloneya Kashuupulwa. Mwinga okwa uvandeke kutya omukanda ngoka oteke gu thikitha kuGavena. Ta ti Kashuupulwa kali po pethimbo aanyanyi yali taya gandja omakemo gawo

LEAVE A REPLY

Please enter your comment!
Please enter your name here