Aazaleki yaMiss Namibia

0
76

SABINA ELAGO

WINDHOEK- Okwa tegelelwa omizalo omiwanawa tadhi fuula oku za kaakondi yiizalomwa aaNamibia mboka taya ka zaleka aakadhona taya kuthombinga methigathano lyaMiss Namibia nuumvo.

Aakondi naanduluki yiizalomwa yuulenga mbaka oyi ipyakidhila lela okukonda iizalomwa dhingi omanga oshiithanene shika shokuhogolola omukadhona dhingi omuNamibia inaashi thika muJuli nuumvo.

McBright Kavari gumwe gomaakondi yomizalo noonguwo oombwaana moNamibia, okwi ilongekidha okunduluka po iizalomwa iiwanawa mbyoka a tegelelwa oku eta po ngaashi a pulwa eshi ninge.
“Ondina omathaneko nomadhiladhilo ogendji taga inyenge momutse gwandje pethimbo ndika.Ngame ondi shiwikile iilonga tayi kumitha noku eta omaipulo, ihe nuumvo onda tokola okukonda po iizalomwa yi li nawa no itaa yi manithamo omeho ndele mbika otayi ka hila aapulakeni naatali pethimbo shoshiithanene shika.Onda nyanyukwa no nda hala esiku ndyoka li thike opo ndi ulike iizalomwa mbyoka nda nduluka po nonda konda,”osho a ulike.

Okwa ti oshinakugwanithwa shoka a pewa kaalongekidhi yethigathano ndika ooshika kutya okuna okuhondja iizalomwa iiluudhe.
“Aalongekidhi oyo ye ya po nethaneko kombinga yolwaala lwiizalomwa nosho wo omuhondjelo, shoka ngame nda tegelelwa ndi ninge osho owala okulonga kiizalomwa iiluudhe hoka ndi na okugwedha ko omwaala galwe,” Kavari a ti.
Okwa tumbula kutya okwi ipyakidhila nale niilonga ye mbyoka, naayihe oyi li pomahala. “ Onda mana nale nomathaneko ondi ipyakidhila ashike nokukonga iiyata, ngame tandi kondo opatolona nenge omuhondjelo opo ihe otandi hondjo mbika, onkene ondi ipyakidhila shili noonkondo,” Kavari a koleke.

“Otandi ti shika ondjodhi yandje ya ninga yoshili okupewa ompito ndjika okukala omuzaleki gwaathigathani yaMiss Namibi.
Osha kala ondjodhi yandje okuza kuunona naandjika osho ya tsu, Donald Diergaardt ngoka ta zaleke aathigathani mbaka onguwo yokongulohi osho a popi nenyanyu.

Okwa uvaneke kutya ota longo neitulemo enene opo oonguwo dhokongulohi ndhika dhikale dhongushu yaashi kuyelekwa molwashoka haaluhe omuntu ho vulu okumona ompito ngaashi ndjika yoku zaleka aathigathani yahugunina yaMiss Namibia.
Diergaardt okwa ti oonguwo dhokongulohi ndhika odha nwethwa mo komahenene gaandjuka nokombuga yoshilongo shetu oshiwanawa. “Aakadhona otaya ka katuka koshitaafula komeho gaatali yawo ya zala omizalo dhokongulohi omiwanawa. Itandi vulu okutegelela esiku ndika li thike opo ndika longe pamwe naakadhona aawanawa omulonga nayaali mboka mesiku lyotango lya Juli,” osho a ti.
Euliko nehogololo lyomukadhona dhingi moNamibia otali ka ningwa mesiku lyotango lya Juli nuumvo pegumbo lyethigathano ndika pohotela ya Windhoek Country Club Resort & Casino.

LEAVE A REPLY

Please enter your comment!
Please enter your name here