Kawana a tumbaleke iihokolola yopamuthigululwakalo

0
56

LOIDE JASON

ONGWEDIVA-Ominista yUyuuki Albert Kawana okwa kumike aawiliki yopamuthigululwakalo ya se oshimpwiyu kutya oompangu dhopahedhi otadhi tokola payuuki ethimbo alihe.

Kawana okwa kumike aawiliki mbaka pethimbo a popitha oshigongi shomapekaapeko ga nkene oohofa dhopamuthigululwakalo dhina okulonga mokufala uuyuki koshigwana.

Oshigongi shika osha li sha ningwa Olyomakaya ga yi mOndangwa moshitopolwa shaShana no she eta pamwe omalenga gopamuthigululwakalo gahetatu oku za, momalelo gopahedhi Ondonga, Uukwaluudhi, Uukolonkadhi, Uukwambi, Ombandja, Ombalantu Uukwanyama nOngandjera.
Kawana okwa ti elalakano lyoshigongi okuninga omapekaapeko goohofa dhopamuthigululwakalo nosho wo okutota po omatokololo galwe okuyamukula komashongo gontumba ngoka aawiliki yopahedhi haya tsakaneke.

“Onda tokola opo ndiye tu kundathaneni nokuninga omapekaapeko okupitila mune oshoka one ha mu kala moompangulilo dhopamuthigululwakalo, one hamu longo momahala moka ne one woo mu shi omashongo ga taaalela omahala ngoka,” osho Kawana a totomona.

Okwa ti nonande oku shishi nawa nkene omalelo ngaka haga longo okwe ga pe ethimbo lya gwana okukundathana naakwashigwana yomomaziko gawo opo ya gandje omayele gawo ngoka taga vulu okutulwa miilonga nokukwathela oshigwana. Okwa ti molwomashongo gopaunongonini ngoka ga holoka po, omapekaapeko ngaka oga li ga kwata uule woomvula mbali nokwa ga ndja ombili kwaashoka.

Minista okwa lombwele ayehe mboka ya gongala moshigongi moka kutya ina shi pumbiwa gumwe a kale omuyamba opo a tule mo oshipotha pamukalo gwopamuthigululwakalo ihe kehe gumwe ota vulu okutula mo oshipotha kombiliha .

“Aaleli yopamuthiguulwakalo ohaya dhana onkandangala miinima yopauyuuki. Onkene mbaka oyo yamwe yomookuume komatokolo. Otaya dhana woo onkandangala moshinima shokukondjitha ondjala noluhepo,” a fatulula ngaaka.
Okwa tsikileko ta ti osha pumbiwa okuya po nomalunduluko moohofa dhopamuthigululwakalo, shoka tashi lundulula oonkalamwenyo dhaantu opo dhi kale oohwepo.

“Ano tu yeni po nelunduluko ndyoka tali eta uuyuuki kaantu yetu ayehe unene momidhingoloko ndhoka tatu lele. Tweeteni uuyuki komazimo, tweeteni woo uuyuki koonakuningilwa omuyonena ” Kawana a indile ngaaka.

Okwa ti okumona uuyuuki inashi kala sha yamwe oyo ayeke, ihe nashi kale uuthemba womuNamibia kehe.
Kawana okwatotha mo kutya ngele omukwashigwana okwa ningilwa omunyonena gwondjuhwa ye ndjoka a likola, na kale a futilwa ondjuhwa ye ongushu yoondjuhwa no inaa pumbwa okukonga nande omukalelipo gwopaveta. A ti mbuka owo uuwanawa wompangulilo yomoshigwana.
Oshigongi oshali woo sha kalwa kaaleli yopapangelo ngaashi oongoloneya, naanashipundi yomalelo giitopolwa monooli .

LEAVE A REPLY

Please enter your comment!
Please enter your name here