Nakudhipaga omwana a holoka ishewe mompangu

0
634

MARIA NAMUPALA

ONDANGWA – Omukiintu gomimvo dhopokati ngoka ta tamanekelwa edhipago lyokanona ke momasiku 15 Kotoba 2015, okwa holoka oshikando oshitiyali mompangu ya mangestrata gwOndangwa omaandaha. Elizabeth Nangolo Gustav ota tamanekelwa iipotha iyali edhipago lyohanona ye oshowo eholeko lyoluvalo. Iikoya mbika anuwa okwe yi ningi mo 2015, eyi ningile komukunda Onamulunga moshitopolwa sha Oshikoto.
Gustav sho a holoka komeho gomupangula Peter Nangula oshowo omweeti gwiihokolola Bruna Muterembi, sho a pulwa ngele okuna oondjo okwa ti kena ondjo miipotha ayihe molwaashoka pethimbo a longo iilonga mbyoka okwali ta ehama. Ta gwedha po kutya iilonga mbyoka a longa iiwinayi, noshi li kondje yoveta okukutha omuntu omwenyo.

Otaku hokololwa nakutamanekwa a mono ohanona ye esiku olyo tuu ndyoka, nokwe yi umbile mondama yomeya noonkambadhala dhoku yi dhipaga.

Aapopepi mboka ya mono oshiningwanima sho tashi ningwa oya nothele ko opolisi, noya mono lwanima kutya ohanona ndjoka inaayi dhimbululwa kutya okakwashike kookantu oya hulitha nale omolwomapiyaganeko ngoka ga ningwa pethimbo lyevalo.
Omukalelipo gwe gopaveta Lameck Mukondomi okwa tseyithile ompangu kutya Gustaf okuna uuvu wopamadhiladhilo, no ita vulu okugandja nokweeta uuyelele poshitaafula esiku lyompangu molwashoka natango ohanu omiti dhuuvu mboka nokwa pumbwa ethimbo.
Omutamanekwa okuli kondje yondjedhililo konima sho a holoka lwotango mo2015 sho ali a mangwapo konima yoshiningwanima shoka. Natango okwa londodhwa kaa haye omakonakono gopolisi moshipala, ye tiiyutha komalombwelo gompangu ngoka a dhimbulukithwa nonande ali ega lombwelwa nale sho a holokele mompangu lwotango.
Oshipotha she oshuundulilwa komasiku ga3 Auguste nuumvo, nompangu oya tegelela omalombwelo okuza komweetipo gwiihokolola gwepangelo, sho oshipotha shi tsikile esiku ndyoka. Omufekelwa natango okuli kondje yondjedhililo. Nokwa pewa omalondodho ngoka ena okwiiyutha kugo manga a tegelela esiku lyiihokolola ya landulako.

LEAVE A REPLY

Please enter your comment!
Please enter your name here