Oongundu-yambidhidhi dha teya iilya oyindji

0
151

LOIDE JASON

OSHIFO-Kansela gwoshikandjohogololo shaRuacana Andreas Shintama okwa pandula iilyo yondungu yambidhidhi mbyoka tayi lumbu nombuto sho ya mono eteyo ewaanawa nuumvo.

Oshigwana shika osha mono eteyo ewaanawa okuza moohektala omugoyi ndhoka shali sha kunu omahangu momudhingoloko gwOshifo moshikandjohogololo shaRuacana. Shintama okwa ti iilonga mbika ya longwa kaakalimo mbaka oye mu kumike unene molwashoka eteyo ndika enene oshikumithi. Ongundu yambidhidhi yedhina Imangulula oyi na iilyo konyala omilongo ne moka omilongo ndatu niiyali aakiintu omanga yaheyali oyo aalumentu..

Ongundu ndjika naandjoka yedhina Omuwa-tuuva oya longa omahangu, omakunde, oofukwa, omatanga nosho wo omushokolo[ iilyawala oyindji.
Ongundu Omuwa-tuuva oya longa oohecta hamano naashika oshe eta oohecta adhihe kumwe ndhoka dha longwa koongundu ndhika mbali dhi kale dhi vule pomulongo nantano.Shintama okwa kumike aalumentu ya yambuke eta ya imangulula opo ya kuthombinga miinyangadhalwa mbyoka hayi longwa kaayambidhidhi moongundu yambidhidhi dho moshitopolwa.“Ngame onda ningi ombangi yeteyo lyeni ndika. Naashika oshiholelwa oshiwanawa, onkene tsikileni nomukumo iilonga mbika iiwanawa,” osho Shintama e ya kumike. Ihe Shintama okwa gunu mboka haya ningi omashendjo nomandjenga inaa ga opala haga ningilwa aantu mbaka, noku dhimbulutha mboka haye ga ningi kutya oshigwana ashihe osha gumwa kombuto ndjika momikalo dha yooloka. Oshoka yamwe otaya lumbu nombuto omanga yamwe oya gumwa kuyo molwashoka ohaya kwatha mboka taya lumbu nayo.

“Ngoye nena ngele kuna ombuto maandjeni otashi vulika muna omuntu ena ombuto, ngele maandjeni kamuna sha nena oshilongo ashihe osha gumwa. Onkee inashi opala okukala to sheke omuntu omanga kuu shi mpoka wa thikama,” osho a dhimbulutha ngaaka. Gumwe gwomaalumentu mboka yeli mendiki ndyoka Gerson Mwanyangapo okwa indile aalumentu ye ethe po eitaalo lya puka ndyoka ye na kutya oongundu
yambidhidhi odhoomeme ashike.

“Ngele oweende pomahala gi ili no gi ili, nena otuuvu taku ti ngoka okuli mehangano lyaakulukadhi. Ihe shika osha puka nosha pumbwa okuhulithwa po meendelelo,” osho Mwanyangapo a popi ngaaka. Omulumentu nguka i imangulula okwa hokolola kutya uuyuni ngashingeyi owa huma komeho nokwa tegelelwa ashike oompito dhaandjukila kehe gumwe dhomauwanawa moongundu ndhika. Onkee osha simana opo aalumentu ya tothe mo iinima mbyoka tayi tungu okukalamwenyo kwawo nokwaantu yawo.
Okwa gandja oshiholelwa kutya mboka taya lumbu nombuto meholamo omitima dhawo otadhi kala inaadhi manguluka na oshidhigu okuthika pomahala mpoka yena okumona omayakulo nuuyelele tawu tungu moonkalamwenyo dhawo.
Omunongononi mongongahangano Tonata, ndjoka hayi ungaunga noongundu yambidhidhi moNamibia okwa kumike mbaka, opo ya tsikile okulonga nuudhiginini opo ya yambule po ongundu yawo.

LEAVE A REPLY

Please enter your comment!
Please enter your name here