Otjozondjupa ya pewa okukoleka oopolohalama dhehumokomeho

0
37

Mpaka otapa landula omiyalu dhontengeneko–thaneko yembo lyiimaliwa yomumvo2017/2018 ya yelekanithwa nembo lyomumvo 2016/2017

DESIE HEITA

Windhoek – Otjozondjupa oshitopolwa sha shitika osha taamba ooN$653, 578 oomilliona dhi lile po ontengeneko-thaneko yiimaliwa yeyokomeho membo lyiimaliwa omumvo 2017/2018.Omwaalu gwooN$217 oomilliona ogwa nuninwa iilonga yoku opalekulula olutenda moshitopolwa shoka.

OoN$90 oomilliona odhi itulilwa okufutila iilonga yokulonga nawa ondjila yoteya pokati kOtjinene na Gobabis. Omanga Oshikondo shElundululo lyevi tashi ka longitha ooN$25 oomilliona okulanda evi.

Oopolohalama dhilwe dheputuko moshitopolwa ndhoka tadhi pewa oshimaliwa ongaashi okalando kaKalkfeld hoka ta ka pewa ooN$1 omilliona okuopaleka omahala opo pwaa ngoka pu tungwe, Otjiwarongo nasho otashi pewa ooN$5 oomilliona okuopaleka evi opo pu tungwe. Oshaanda otashi pewa ooN$10 oomilliona, Otavi ooN$13 oomilliona, Okahandja ooN$4 oomilliona. Iimaliwa ayihe mbika oya gandjwa koondoolopa ndhika opo dhi opaleke omahala nenge evi mpoka tapu tungwa unene tuu omagumbo gaakalimo miilando mbika.

Ontengenekothaneko yehumokomeho oya tula po ooN$6 oomilliona okutunga omweelo guupitilo poongamba dhaDobe omanga ooN$1 omilliona tayi longithwa okutunga po endiki lyokugamena aakongi yuuntauki moshitopolwa shika kohi yOshikondo shIikwagumbo mUutembukilimo. Ombelewa yOmuperesidente oya pewa konyala ooN$30 oomilliona okunkondopeka iilonga yegameno lyoshilongo moshitopolwa shoka.
Etanga lyegameno lyaNamibia otali longitha oodola omilliona yimwe okuopaleka ontanda yaakwiita Osona, omanga ooN$900 000 otadhi longithwa okuopaleka noku endekulula ontanda yaakwiita mOtjiwarongo.

Uumisteli wElongo, Uunkulungu nOohedhi otawu longitha ooN$36,5 oomilliona okutunga oseko yopombanda yaDonatus modistrika yaGrootfontein, oprimaskola poTsaraxa-aibes mOtjiwarongo noprimasikola onkwawo mOtavi. Iimaliwa mbika otayi ka longithwa wo okuopaleka omagumbo gaaniilonga yoNational Institute for Educational Development mOkahandja. Oshipambu shiimaliwa mbika otashi longithwa wo okutunga omagumbo gaalongisikola moshitopolwa.

Uuministeli wUukalinawa nIilonga yOnkalathano otashi longitha ooN$46 oomilliona ndhoka konyala etata lyadho tali longithwa okutunga ompungulilo ompe yomiti osho wo olabora ompe yuunamiti moshitopolwa shika . Iimaliwa ya hupa ko otayi longithwa miilonga yokutunga nokuopaleka omandiki guundjolowele wopetameko nuupangelo moshitopolwa shika. Ope na ooN$5 oomilliona dha nuninwa eopaleko lyoshipangelo shodistrika Okakarara, nooN$5 oomilliona oonkwawo odha nuninwa okuopaleka oshipangelo mOkahandja.OoN$5 oomilliona oonkwawo odhi ikalekelwa okulongithwa moshipangelo oshinene moshitopolwa shoka tashi adhikwa mOtjiwarongo.
Oshikondo shIikwafabulika, Iipindi nehumithokomeho lyOongeshefa Ooshona, nodhOpokati otashi longitha ooN$20 oomilliona okutunga ofabulika yokuhambula omiti pOkahandja nooN$10 oomilliona oonkwawo okutunga po omahala goofabulika moshitopolwa shika.

LEAVE A REPLY

Please enter your comment!
Please enter your name here