Rodney Doeseb omudhani gwoBrave Warriors omukulu

0
57

SHIPI ELAGO

Oshiwike shika Kundana ote ku etele omudhani omukulu gwoBrave Warriors gwokonima ngoka a li a dhana mosipana yopashigwana yokatanga kokoompadhi okuza 1999.

Sho a li moonkundathana na Shipi omunamimvo 41 ngoka e li omvalele ya Walvisbay nongashingeyi oye omukuluntusikola gwoEben Ezer Primary School moKaribib okwa li a holola kutya ye okuhole omaudhano sigo onena.

Rodney Wallace Doeseb okwa dhanena osipana yopashigwana iikando yi li 41 ongomudhani gwokonima.
“Onda li nda mono ompito yoku ithanwa koBrave Warriors mo 1998 sho osipana yopashigwana ya li tayi ilongekidhile okuya kekopi lyiigwana yAfrika koBrukinafaso ashike onda li nda thigwa po sho osipana ya li yi na okutuma ashike aadhani ye li 22 nethimbo ndiyaka ehala lyandje ndyoka handi dhana olya li tali kondjelwa kaadhani oyendji noonkondo “Rodney a ti.

“Ashike sho nda mono ompito mo 1999 onda li nde yi taambako nuudhiginini nonda li mosipana ndjoka ya li ya yi kedhingoloko lyahugunina lyoCOSAFA naZambia mo 1999,” Rodney ta tsikile. Kakele kosipana yopashigwana Rodney okwa dhanena osipana yoRobber Chanties yaKhorixas okuza mo 1993-1994.

Doeseb okwa li wo a dhanene osipana yoChiefs Santos yaTsumeb okuza mo 1995-2001. Pokati komimvo 2001-2002 Doeseb okwa li a dhanene osipana yo Tigers moVenduka omanga inaa galukila kosipana yoChief Santos pehulilo lyomumvo 2002 sigo 2006.
Okwa li wo a dhanene osipana yo Eleven Arrows FC 2006-2008 nokonima Doeseb okwa ka joina osipana yoBlue Boys ya Swakopmund moka a li omudhani nomudheuli pethimbo limwe.

Pethimbo lyuudhano woshikako shomumvo 2011-20012 okwa li a dhanene osipana yo SGC yaSwakopmund moka wo ali omudheuli.
Okwa ti onakuyiwa ye yokatanga oya hulu kuyele konima sho a li moshiponga shohauto shoka shemu thigile eli monkalo ombwiinayi uule woomwedhi dhontumba naa sho a zi moshipangelo ka li ta vulu we okukuthombinga momaudhano.
Ashike Doeseb ina etha po omaudhano oshoka okwa li a tsikile noshilonga sho ku dheula, moka e li a dheula osipana yErongo U/20 naandjika oya ka sindana po ekopi lyo The Namibia Cup mo 2012.

Okwa li omuwiliki gwendiki lyo Galz&Goals moSwakopmund 2012, okwa li wo a dheula osipana yoEleven Arrows 2012-2013 noku li omudheuli gwosipana yaKaribib United sigo onena.

Rodney oku na oonkatu dhokudheula odhindji naandjoka onene poonkawo oyo ndjoka hayi ithanwa CAF A licence ndjoka yi li onkatu onene mokudheula aadhanitanga muAfrica. Rodney Wallace Doeseb okwa ti nando ehole etanga oha topola ethimbo lye nawa opo kaalye iilonga ye yoku lela osikola okapondamusita.

Rodney oye wo a dheula osipana yErongo ndjoka ya li ya yi kedhingoloko lya hugunina mekopi lyoThe Namibian Newspaper Cup nuumvo moSwakopmund.

LEAVE A REPLY

Please enter your comment!
Please enter your name here