Tumeni ounona kofikola

0
74

TUULIKKI ABRAHAM

Lüderitz – Omukokoli Presidente waNamibia Dr, Sam Nujoma, okwa indila ovadali vafye oshisho okutuma ounona keefikola, opo vadule okumona ehongo.

Omukokoli Presidente okwa tumbula kutya oluhepo otali dulu ashike okukandulwapo, moshilongo ngee ounona tava tumwa keefikola vaka mone ehongo, opo oshiwana shokomongula shidule okukaninga oondokotola nee engineer, oshoyo ovayuli veeshi vahongeka. Omukokoli Presidente okwa indila yoo epangelo laNamibia, li yambidide neenghono ouMinisteli wEhongo, kukwashilipalekwe kutya okanona keshe, okamona ehongo. Dr Nujoma okwa indila oshiwana shi longele kumwe, shi nanene ombinga imwe, shoo shi longe nelitulemo, kukandekwe oluhepo moshilongo.Omukokoli Presidente okwa tumbula edi pefimbo a talela po odoolopa ya Lüderitz oule womafiku avali, oshivike sha dja ko. Pefimbo letalele po Omukokli Presidente okwa talelapo ofaablika yeeshi yaNovaNam, eembelewa delelo lodoolopa, omo omunambelewa omukulunhu melelo loLüderitz Aunie Gideon, e mu kufilako kombinga ye yo komesho modoolopa.

Pefimbo opo tuu opo omunambelewa omukulunhu metuliloskepa la Lüderitz Max Kooper, naye yoo okwa hokololela Dr. Nujoma nhumbi etuliloskepa tali xumu komesho.

Omupedu Meya okwa pa Omukokoli Presidente, omaano edalo laye, olo opo a dimbulukile omafiku manini a pita po eshi a wanifa eedula 88.

Kakele keenhele edi Omukokoli Presidente okwa talela po Lüderitz Waterfront Development, unene tuu onhele omo mwa pungulwa, oikwafuta, ili momatungo eembelewa daNamport.

Elalakano letalelepo lomukokoli President okwa shiivwa owina kelelo loLuderitz Waterfront Development, nelalakano opo omukokoli President euye atale etungo lo Old Power station, olo la tungwa po omudo 1911, nopaife otali wapalekwa nokulongololwa koshimaliwa shifike N$300 oomilliona, li dule okutulwa pamufika uli nawa.
Metungo eli omwa fanekwa tamu ka kala omhungulilo yoinima yomefuta oshoyo oshitayi shoNamibia University of Science and Technology (NUST). Metungo omo tuu omo otamu ka kala yo oikondo ngaashi shEeshi noshoyo osho shOmaudano.

Eshi a tambulako Omukokoli Presidente moLüderitz, Omupedu Meya Brigitte Fredricks okwe mu pandula neenghono omolwoilonga yaye iwa eshi a ufanena ovakwati veeshi veuye okudika eefabulika modoolopa oyo.Fredricks okwa tofamo ehangano la Pescanova olo la yeulula ofabulika yeeshi moshilando eshi nokuyandja eemhito dihapu doilonga kovanhu vahapu moNamibia.

LEAVE A REPLY

Please enter your comment!
Please enter your name here