Aakwanangombe taya kala noshituthi shokomumvo

0
124

MARIA NAMUPALA

HELAO NAFIDI–Ezimo lyaakwanangombe olyuuvaneke tali kala tali dhana oshituthi shezimo omumvo kehe, nuumvo olyali lya dhana oshituthi shoka petameko lyomumvo sha ningilwa mondoolopa yaHelao Nafidi.

Gumwe gwomezimo ndyoka Abraham Shikongo okwa ti ohashi kala oshiwanawa uuna aakwanezimo taya tsakanene nokutseyathana, yo taya ikundu woo ipambele yezimo, ta ti oshinima shika osha pumbiwa unene komapipi ngoka opo taga putuka, noga pumbwa okutseya ondjokonona.

Ta ti aakwanangombe oyuunganeke oshituthi shawo shomuhanga, ya gongale yo taya nyanyukilwa pamwe, “Moshituthi shika otwali wo twa popithwa kaasimanekwa ngaashi Mayola gwaHelao Nafidi nok`Omukalelipo gwoMukwanilwa gUukwanyama ,Kansela gwoshikandjohogololo Oshikango,omukalelipo wa Gavena gwOhangwena okupopyapo ashike yamwe,” a ti ngaaka
Oshituthi osha kalwa kAakwanangombe ya za kiitopolwa ya yooloka, “Elalakano lyoshituthi shezimo Ekwanangombe, olyali okutseyathana, okutseya omuntu nomuntu, okutseya oondhikwa dhetu, okutseya ezimo ekwanangombe nosho wo onziililo yEzimo Ekwanangombe, okulonga omapipi omashona omilandu dhezimo,” Shikongo a fatulula ngaaka.

Okuza esiku ndyoka oya tokola kutya oshituthi shawo otashi kala tashi dhanwa omumvo kehe, noya thaneke taya ka eta po nokunyanyangidha embo lyezimo moka tamu kala muna iinyolwa yezimo okuza koonkungulu dhezimo sigo okuunona uushona.

Okwa gwedha po kutya osha simana muuyuni awuhe aantu ya kaleke po omazimo gawo, yo ya kale taya hangana muukumwe, yo taya tseya onziililo yomazimo nonkene aakulu yonale ya kaleke omazimo gawo muukumwe.

Ta ti shika oha shi ningwa unene kaantu mboka yuuviteko, a ti otashi kwathele mokutseya oohandimwe, oondhikwa dhezimo oshowo oonkungulu dhezimo. Okwa pula aagundjuka ya kale taya gongala piituthi yomazimo, yo taya kala muukumwe okuhanganitha nokweeta pamwe aakwanezimo yezimo lyontumba.

“Omazimo ogendji oga kwatwa kombepo yuutondwe noyetopoko, ashike shino ngele aantu mezimo lyontumba ohaya hangana ombepo ndjoka otayi zimo thilu, yo taya pangelwa kombili nohole yuumwayinathana,” ta gwedhapo ngaaka.

Shikongo ta ti ohashi kwathele uuna aakwanezimo yena embo, nohashi pupaleke oonkalamwenyo dhaanona mboka taya putuka yo ya tseye kutya ezimo lyo lyene olya ziilila peni,ta ti ezimo lyawo ka lya li lyi ishi ashike sho ya tsakanene nena oye shaathane nenge ha ayehe yali ya holoka koshituthi shoka.

LEAVE A REPLY

Please enter your comment!
Please enter your name here