A lyatwa keetaxi adishe mbali

0
1561

Komutoolinghundana

EENHANA- Opolifi yoshitukulwa shaHangwena otai konaakona edipao lihefi loshiningilawina, eshi Josef Kapiye Shakela weedula dihe shiivike a lyatelwa mondjila yakula poukamba vaNakatumbe kotaxi ya dja kEenhana manga a li ta tauluka oshitauwa.

Ashike manga ovanhu opo tava tale kutya olye a lyatwa otaxi ikwao tai dilile kombinga yaShigambo oya tondoka ko vali kuye nokufaduka po. Ouyelele owa yandjwa komunambelewa omupopiliko wopolifi yoshitukulwa shaHangwena Shisante Kaume Itumba.

Oshiponga sha ningwa oshivike e shi oshahalula ovaNakatumbe novopomudingonoko. Ovakwapata ova shiivifilwa nomudimba ou li mokila yoshipangelo shaEenhana. Itumba ta pula oshiwana shi lopote kopolifi omushingi woCorrola itilyana engiwili, va li no va twaalelwa metuwa la lyata omunhu a fya nale nokufaduka po.

Omunambelewa wopolifi okwa weda po vali kutya, natango mefiku olo tuu olo loMaandaha, Lukas Paulus womido 40 lwaapo wokoKahaufiku, okwa ngwadjulwa kotaxi mepandaanda laDimo Hamaambo pokati koLagoca nOshinanena mEenhana. Paulus okwa ehama momutwe nota ti xwepo moshipangelo shaEenhana, nopolifi oya patulula epeko leshingo nouhasha .

Itumba ta ti vali, natango opolifi otai konaanona oshibofa eshi omushingi wotaxi yoRunX a li mo novatwaalelwa vatatu, a li ta shingilile okudilila konima, te lidenge komatako eloli. Ovatwaalelwa vavali va mona oiponga ova ukifwa koshipangelo shaNgela moshitukulwa shaHangwena.

Omupopiliko wopolifi moshitukulwa shaHangwena okwa denga omufindo kouhasha wovashingi vahapu. Gideon Tuyoleni womido 59 ehe na ombapila yokushinga, ta di nokatauwa kopOngha moshikandjohoololo shaNdola, okwa nukila moshitauwa te li denge mokataxi okaRunX taka di kOndangwa. Apa metuwa keshe omwa li ovanhu vane naavo va mona oiponga ova hakulwa pOngha. Molwomuvalu woiponga ya etifwa keshingo louhasha wa hapupala koitukulwa aishe yoshilongo, opolifi otai kumaida ovashingi va kale alushe oupafi mokushinga no itai ke lididimikila vali ovashingi tava shingi nouhasha inaava shikulwa.

LEAVE A REPLY

Please enter your comment!
Please enter your name here