Ohangwena – oshitopolwa tashi humithwa komeho kiikwamatungo

0
118

Mpaka otapa landula omiyalu dhontengeneko–thaneko yembo lyiimaliwa yomumvo 2017/2018 ya yelekanithwa nembo lyomumvo 2016/2017

DESIE HEITA

Ontengenekothaneko yooN$312 oomilliona dha nuninwa oshitopolwa Ohangwena odha kalela po eshonopalo enene momwaalu gwiimaliwa yi na okulongithwa mehumokomeho moshitopolwa shoka. Omwaalu nguka omushona lela ngele ogwa yelekwa naangoka gwembo lyiimaliwa lyomumvo 2015/2016 ngoka gwa li konyala ooN$600 oomilliona.

Ihe nando ongaaka iilonga yeyokomeho moshitopolwa shoka otayi tsikile okupewa oshimaliwa. Iilonga yetungo lyendiki lyomaudhano mEenhana oya tsikila natango sho Oshikondo shOmaudhano nAagundjuka sha pewa ooN$14 oomilliona molwiilonga mbika. Omwaalu gwiimaliwa yehumokomeho tagu longithwa moshitopolwa shika otagu ziilile kOshikondo shIilonga Niiyenditho, molupe lwooN$103,6 oomilliona dha nuninwa iilonga yolutenda, okutula oteya kopate yokuza kOngenga yu uka kOshakati oshowo kwaandjoka ya za kEenhana yuuka kOshigambo.

Ope na wo omiyalu dhiimaliwa ya nuninwa iilonga yoopate dhomamanya moshitopolwa, ngaashi ndjoka yoshinano shookilometa 19 pokati kEndola nEemboo, ondjila yookilometa omilongo 71 pokati kEtomba nOmundaungilo, ndjoka yookilometa 47.7 okuza mEnyana sigo Olukula, nondjila yookilometa 40 pokati kOupili nOnkumbula. Iilonga yokutula oteya kopate yokuza kOmafo tayi piti mOngenga sigo otayi thiki kOutapi oya pewa ooN$1 omilliona.

Ope na omwaalu gwooN$40 oomilliona gwiikalekelwa okumanitha oshinano shookilometa 36 dhondjila okuza kOnhuno tayi piti mEndola sigo otayi thiki mOkatana.

Kombinga yawo Uuministeli wElongo, Uunkulungu nOohedhi owi itulila ooN$65,7 oomilliona okudhilongitha mokuopaleka oosikola nomihandjo dhokukala moshitopolwa. Oseko yaShikunde otayi pewa ishewe ooN$8 oomilliona nuumvo, omanga ohostela nekulo poseko ya Shituwa oya tulilwa po ooN$15 oomilliona.

OoN$5 oomilliona odhiitulilwa okutungitha po oseko ompe yo New Vision Secondary School moshikandjohogololo Epembe. Oodola oomilliona omulongo odha nuninwa etungo lyoombelewa oonene dhelongo moshitopolwa Ohangwena. Omagumbo gaalongi otaga tungithwa kooN$6,6 oomilliona.

Oshikondo shUundjolowele oshiikalekela ooN$10,8 oomilliona okuopaleka omagumbo guuholameno negameno, eyambulepo lyuukilinika wuundjolowele wopetameko osho wo okufutila iilonga yokupangela nokukaleka po moshitopolwa. Oshikondo Shoomina nIikwankondo otashi ka longitha ooN$5,6 oomilliona okushenopeka omahala gokomikunda.

Uuministeli wUuyuki otawu longitha ooN$12 oomilliona okuyambulapo nokutunga oohofa dhopevi moshitopolwa.
Iilonga yokuopaleka omahala nevi kohi yUuministeli weyambule po lyIilando nOmikunda oya uthilwa oodola konyala oomilliona N$54 okutulapo omandiki gomayakulo pOkongo, Eenhana noshowo Helao Nafidi.

Uuministeli wUunamapya otawu longitha ooN$29,5 oomilliona mokokola po iihwa inaa yi pumbiwa, okugandja omeya komikunda, ewiliko mekaleke po lyomakuti nehwepopeko lyuundjolowele wiinamwenyo.

Opena oodola oomilliona ndatu oshinkwanu ndatu dhina sha nopolohalama yomatulululo okupitila mUuministeli wEvi oshowo oodola omilliona yimwe oshinkwanu ne yehumithokomeho lyiitopolwa yokomikunda moshitopolwa.

LEAVE A REPLY

Please enter your comment!
Please enter your name here