Omukiintu mokakuma molwa ehepeko lyomulume naanegumbo

0
1015

KuMaria Namupala

ONALUNIKE -Aanegumbo yamwe, mwa kwatelwa omusamane mwene gwegumbo, ngoka ena uulema womeho momukunda Onalunike B anuwa otaya li taya pi taya monithwa iihuna komulukadhi mwene gwegumbo molwaashoka ta longitha omalovu nayi.

Otaku hokololwa omusamane Tomas Mpingana a tseyika nawa Muposi gwaTooma naanegumbo ye, haya lala ondangala molwa omukadhi ngoka ha yi kuundingosho hoka ha zi teya okuya tilitha nomakatana, ye ta lumata omusamane.

Omathimbo gamwe anuwa oha kaleke omusamane pomutenya opo a pye nawa ketokopya. Omolwa iihuna mbika,omunamimvo 63 Veronika Amukwaya okwa kwatwa po kopolisi nokwa holoka mompangulilo yaMangestalata mOndangwa moka ta pangulilwa omahepeko gomomagumbo. Mbaka otaya li omulilo pethimbo epangelo tali kumagidha oshigwana shi hulithe po omahepekathano gomomagumbo.

Otaku fekelwa kutya uulema waMuposi gwaTooma, owo tawu etitha unene opo omukadhi a kale temu hepeke ngaaka oshoka ita vulu okwiipopila.

“Oshinima shika osha tameke nale manga opo twa hokana omimvo odhindji dha piti po, nosha geye unene sho nda kanitha oshipala. Olundji oha dhenge ndje nokukuthila ndje omakatana, onda kala nokulopotela opolisi yomoshitopolwa ashike inayi kwatha ndje nande moshinima shika,” Muposi gwaTooma ta gwedha po ngaaka.

Sho Kundana a talele po egumbo lyaaTooma oshiwike shika omwana gomukulupe ngoka Hileni Mpingana, okwa yelitha kutya yina oha hepeke unene he, sho eli monkalo ndjoka yokwaa ha monako. Ta ti olundji ngele ya thigwa megumbo oyo ayeke yina oha dhenge he noku mu tula pomutenya.

Ta ti oshiningwanima oshitalala osha ningwa oshiwike sha zi ko, sho omukulukadhi ngoka eya megumbo a nwa nokupiyaganeka omusamane naanegumbo ayehe. “Okwa li eya megumbo a kolwa nokwa tameke ta nyenyeta iinima yaana shilonga, okwa li aadha ndje mondunda yetu yokulala moka omo handi kala olundji, naasho aanona ya teleke uulalelo oyali ye mwiithana e ye a lye ashike okwa ti anuwa ina hala okulya omakulya gawo,” Hileni a hokolola.

Lwanima anuwa sho gwaTooma a ka lala omukadhi okwe keya pondunda ta kondjitha a patulule po, nani okuna ekaatana a hala okuhahala po omweelo gwondunda.

Okwa kala anuwa ta thininike a ye mondunda ashike okwa nyengwa oku undula po omweelo ngoka.
“Otwali twa kugu naashiinda oyali ye ya konkugo, okwa kala ta tidhile aashiinda mepya ye a humbata ngaa ekaatana ndyoka ta ti ote tu monitha oshiponga. Sho e ketu nyenga otwa tseyithile opolisi noye tu lombwele kutya ka yi na ohauto otayi ya esiku lya landula ko,” Hilma Mpingana osho a ti ngaaka.

Oya gwedha po kutya omukulukadhi nguka oha longo owala iinima mbyoka uuna a kolwa naaluhe ngele a za kuundunda womanwino, oheya ta piyaganeke egumbo nokudhengagula omusamane.

Omusamane okwa yelitha kutya okuna oshaadhi komulungu, sho a li kokotwa komukadhi konima yoomvula mbali.Ta ti Amukwaya a pewa oomwedhi hamano e mu kale kokule.enokwali a pewa uule woomwedhi hamano ya kalathane kokule, ndele omukulukadhi ihiiyutha komalombwelo ngoka.

LEAVE A REPLY

Please enter your comment!
Please enter your name here