Onhanda yofikola yoSoondaha yotete moRosh Pinah

0
64

TUULIKKI ABRAHAM

Lüderitz – Ofikola yoSoondaha mongeleka yaELCIN moshitayi sha Rosh Pinah oyali nonhanda yavo yotete, meongalo Eben-Ezer mo Lüderitz ohani ya daja ko.

Monhanda omwa kala omaongalo a ne. Omaongalo oo ali a tuma ounona vofikola yoShoondaxa veuye konhanda oo,Eben-Ezer moLüderitz, eongalo lokoAussenker, Rosh Pinah, oshoyo eongalo laBethel kOranjemund.

Omuwiliki wofikola yoShoondaxa meongalo Eben-Ezer moLüderitz, yee oye yoo omuwiliki wofikola yoShoondaxa aishe mOshitayi shaRosh Pinah, Priscila Ndakevondjo, okwa tumbula kutya, ongeleka yaELCIN oyakufa ko eenghaku, opo ounona va tekulilwe oukriste okudja pedu.Ndakevondjo ta fatulula kutya, ELCIN okwa tula po omulandu, opo okanona keshe kaye mofikola yoShoondaxa, opo ashike kaka mone eefelo lokuya mofikola yepameko ngee ka fiki pomido dokuhovela ofikola oyo.

Onhanda yotete, yofikola yoShoondaxa,moshitayi sha Rosh Pinah oya unganekwa meongalo laEben–Ezer mo Lüderitz, nounona vafika pomafele avali, ovali monhanda ei.

Ndakevondjo okwa ti, shaashi eshi oshikando shotete, monhanda ei ina kulongekidwa natango epandela ile ekopi, opo likale nokukondjelwa, ndele ovali ashike va longekida ekonaakono lOmbibeli.

Ounona ovanyolifwa ekonaakono lOmbimbeli, kutalike kutya, ounona vo keongalo lilipi, veshii nawa omishangwa domOmbibeli.
Ounona vomo Eben-Ezer moLüderitz oveuya ponhomola yotete eshi va mona oitwa ili 31, taku landula ounona vokoBethel mOranjemund, va mona oitwa 22.

Ndakevondjo ota hokolola onhanda yaenda nawa, nota pandula eengudu domalwiimbo meongalo Eben-Ezer, oshoyo, eongalo la Anglikan, neongalo laExodus moLüderitz eshi vayambidida opo onhanda ei idule okupita.

Onhada oya fanekwa tai kala hai kalako odula keshe muMai, odula tayi uya oya fanekwa tai ka kala keongalo laBethel kOranjemund.
Ndakevondjo okwa indila ovadali va tume ounona kofikola yoSoondaxa, va dule okutekulilwa oukriste nokulongwa Ombibeli, omanga vanini.

Helena Kaena omuwiliki wofikola yoSoondaxa keongalo laBethel kOranjemund okwa pandula ovadali, eshi va mangulula ounona vavo, opo vaye konhanda koLüderitz.

Kaena okwa tumbula kutya onhanda oya enda nawa, nounona ovali va holoka lela momuvalu muhapu.

LEAVE A REPLY

Please enter your comment!
Please enter your name here