Oospana 16 muudhano waDebmarine tadhi pewa oshindji

0
23

OTNIEL HEMBAPU

Windhoek- Aalongekidhi yuuudhano wekopi lyoDebmarine Namibia oya li ya ningi ehogololo lyoospana nkene tadhi ka dhana medhingoloko lya landulako. Pethimbo olyo tuu ndyoka aalongekidhi oya tseyitha kutya oospana naadhani otaya ka pewa iimaliwa ya gwedhwa po. Kakele ketseyitho ndika aalongekidhi oya holola wo mpoka tapa ka dhanenwa omaudhano ngaka koospana ndhoka dhili medhingoloko lyoospana omulongo nahamano. Omaudhano ngaka otaga ka dhanwa momasiku 17 gomwedhi tu uka pokapale kaKuisebmund mOmbaye nopokapale kuudhano moMalinda.

Oospana ndhoka tadhi tsakanene muudhano mOmbaye odho Try Again taya tsakanene na Eleven Arrows, Touch and Go taya dhana naRundu Chiefs ye Tura Magic otaka kondja naGendev, Unam ota tsakanene naMighty Gunners. Mokapale kaMalinda, Young African otayi ipalamene na Life Fighters, ye Civics ota taalele Young Beauties. Young Chiefs ota kondjitha Bee Bob Brothers omanga Outjo Academy FC taya ka pwakela na Eastern Chiefs.

Aalongekidhi oya ti otaya ka koleka mbala omathimbo mpoka uudhano mbuka tawu ka tameka okudhana.
Debmarine omukwashilipaleki guudhano mbuka okwa tseyitha onkundana ombwaanawa pethimbo ndika yi na sha niimaliwa mbyoka tayi ka pewa aadhani noospana ndhika. Okwa ti omudhani kehe dhingi muudhano ota pewa oodola eyovi a tule mondjato ye, na ishewe ota gandja oodola eyovi kehangano ekwatheli ndyoka ye a hogolola.

Ondjambi ndjika yomudhani dhingi muudhano otayi ka tsikila nokuyeluthwa sho oospana tadhi ende dhu uka kedhingoloko lya hugunina sho omudhani dhingi muudhano kehe ta ka pewa oodola eyovi nomathele gatano oshowo eyovi nomathele gatano tali pewa ehangano eyambidhidhwa ndyoka a hogolola uuna ospana ye ya yi kedhingoloko lyokota finala. Omudhani dhingi muudhano medhingoloko lyosemifinala otaka mona oodola omayovi gaali omanga omudhani dhingi muudhano wa hugunina otaka faalela oodola omayovi gatano kegumbo.

Oospana ndhika omulongo nahamano kehe yimwe otayi ka pewa ngashingeyi oodola omayovi omilongo mbali gokwiilongekidha osho wo gomalweendo okuya komahala hoka taku dhanenwa uudhano mbuka.

Omanga oku uka pehulilo lela oospana mbali ndhoka tadhi thiki pehulilo lyuudhano otadhi ka pewa kehe yimwe oodola omayovi omilongo ndatu okwi ilongekidhila uudhano wa hugunina mboka tawu ka kala ko momasiku 25 gaNovemba nuumvo. Omudheuli dhingi oshowo omutuli mo gwookoola odhindji kehe gumwe otaka pewa oodola omayovi omilongo mbali.Omanga omukwati dhingi, omuhikihiya kamana nomukwatheli hikihiya a pyokoka muudhano auhe otaka pewa kehe gumwe oodola omayovi omulongo nagatano.

LEAVE A REPLY

Please enter your comment!
Please enter your name here