Oshikonga shokwoopaleka sha tulwa miilonga mOshikoto

0
52

MARIA NAMUPALA

OMUTHIYA – Omolwiiyagaya ya napakana miikandjohogololo ya yooloka moshitopolwa Oshikoto Uuministeli wOmidhingoloko nOmatalelepo pamwe nelelo lyoshitopolwa shoka oshowo oRecycle Namibia Forum, oshiwike sha yi oya tula miilonga pambelewa oshikonga shokwoopaleka, sha ningilwa mOmuthiya.

Pethimbo ta tula miilonga oshikonga shika Omupevi minista mUuministeli wOmidhingoloko nOmatalelopo Tommy Nambahu okwa ti Namibia osho oshilongo shimwe sha yela, noshina aaleli taya etapo omilandu moku kaleka oshilongo shika sha yela noshi li muundjolowele.
Nambahu okwa ti shika osha hwahwameke uuministeli wu ye kiitopolwa niitopolwa, wo wu tule miilonga iikonga yokwoopaleka, nokutseyithila aakwashigwana ya kale taya opaleke omidhingolongo dhawo, yo iinima mbyoka ya pumbwa okulongululwa yi kale tayi gongelwa nokufalwa komahala hoka haku longululwa.

“Iikonga mbika otayi gandja elongo kaakwashigwana yetu ya kale ya tonatela eyopaleko, yo ya kale ye shi kutya elalakano lyokukaleka oshilongo nomahala gawo ga yela oga shike, ta ti okukala pehala lyaana uuyogoki kashishi owala okuulika nkene oshilongo sha kaka ashike otashi gandja woo ethano ewinayi kaatalelipo noku kakeka ewangandjo ndyoka lya pumbwa okugamenwa,’ Nambahu a ti.

Okwa ti elalakano lyuuministeli okukaleka oshilongo shi li muundjolowele, naantu mboka ye limo ya kale momahala gena uuyogoki no taga hokitha, naashika otashi kaleke wo omikithi ndhoka hadhi taandele mombepo kokule.

Esiku ndyoka oshikonga shokwoopaleka sha tameka, Omupevi minista pamwe na Ngoloneya goshitopolwa naanambelewa yiikondo ya yooloka naakwashigwana, oyali yo opaleke ondoolopa yaMuthiya, noku indila aakalimo ya kale nokwoopaleka poompito adhihe.

Nambahu ta ti oshikonga sha fa shika otashi ka ningwa woo kOkakarara, Rehoboth, Opuwo nosho tuu. Okwa pula omalelo giitopolwa ga kale taga hwahwameke aakwashigwana ya tsikile nokwoopaleka, yo taya kala aluhe taya longo muukumwe ya kaleke omahala gawo ga yela.
Okwa uvaneke kutya Uuministeli we pamwe nomalelo giitopolwa noshowo Recycle Forum Namibia otaya ka longela kumwe mokukwashilipaleka kutya Namibia olya yela nawa apehe.

LEAVE A REPLY

Please enter your comment!
Please enter your name here