Aayelele mUukwiyuushona ya pewa uukwashigwana

0
72

LOIDE JASON

ONGWEDIVA-Kansela gwoshikandjohogololo sha Uukwiyuushona Andreas Amundjindi okuuvite etumba sho konyala aayelele ayehe moshikandjohogololo she ya pwako kokumona uuthemba woshilongo.

Amundjindi okwa ti nuumvo sho a ningi iigongi moshikandjohogololo she ashihe okwa li iitsumo aayele mboka kaa ye na uuthemba ngaashi oonzapo dhomavalo nosho wo uumutse woshilongo ihe ngashingeyi ayehe mboka a li a lopotelwa oya mona oombapila ndhoka.

“ Mwaamboka twi itsa mo oomboka uunona uushona, aagundjuka yepipi lyopokati nosho wo aakulupe,” osho kansela a ndjandjukununa ngaaka.

Okwa ti yamwe yomwaamboka ya mono uuthemba wa wo oshiwike sha zi ko aakulupe yaali mboka ya li yena iinima yawo ya patekena oshoka oya li yena uumutse mboka uukulu waSouth Afrika .

Ota ti kutya oshali oshidhigu aakulupe mbaka ya patu kununwe oshoka omadhina gawo ngoka gali geli puumutse wawo mboka uukulu hago we ya longitha sho ya ningi omaindilo guumutse mboka tawu longithwa ngashingeyi.

Ihe Amundjindi okwa ti shika ngashingeyi oshinima sha pita mbaka okwe ya kondjitha opo ya longithe omadhina gawo ngoka omakulu opo ya vule oku mona uumutse opo ya vule okukiinyolitha openzela oshoka oomvula dhawo odha adha mepipi lyoomvula dhaa mboka haya taamba openzela.

Shika okwa ti otashi nyanyudha noonkondo oshoka osha kala elalakano lye ongomupiya gwoshigwana opo kehe omukwashigwana omuNamibia a kale ena uuthemba woshilongo moshitopolwa she.

Okwa ti osha simana onga omuleli okutalela po aakwashigwana moshikandjohogololo opo wu uve omaupyakadhi ngoka ge ya taalela.
Ta gwedha a ti nguka ogo omukalo a longitha opo a manemo aayelele ayehe ya kale yena uuthemba yo ya wape oku kala ya shangitha oyana oku taambwa omauwanawa ngoka taga gandjwa kepangelo ga nuninwa aanona aakwanaluhepo nosho wo mboka ya valwa kaayelele.

Okwa ti nonande oshali oshidhigu okumana mo aayelele mbaka moshikandjohogololo, molwasho ihaya gongala kiigongi, okwa pandula aakwashigwana ye mboka ye mu ulukile ayehe mboka ya pumbwa eyambidhidho lya kansela opo pwaa thigale nande ogumwe shinasha nehumo komeho.

LEAVE A REPLY

Please enter your comment!
Please enter your name here