Ambala a tsipulwe omeho molwa uufuthi

0
3480

MARIA NAMUPALA

OMULONDO – Omulumentu omugundjuka okwa zi koshakapalwa, konyala a ninge omuposi thiluthilu sho anuwa omukwashigwana ngoka a vulwa oku yakelwa iinima ye a tokola opo emu tsipule omeho.

Otaku hokololwa omunangeshefa omushona momukunda Uuyoka mOshitopolwa shaShikoto i ikuthile oveta miikaha sho anuwa a tsu nelalakano lyokukutha Titus Sam omeho.

Sam ngoka anuwa ha teya uundingosho waantu, anuwa okwa zi kelungu, oshoka oku wete ko ngaa kashona.
Edward Paavo okwa ti okwa thiminikwa okukutha onkatu ndjika ondhigu sha landula sho ondunda ye yongeshefa ya kala tayi teywa komulumentu ngoka konyala a tsipula omeho ihe nando anuwa na lombwele opolisi iha mono ko ekwatho. “Omwedhi gwa ziko okwa li a teya okandunda kandje nokukutha mo iinima yandje oyindji, onda tseyithile opolisi ashike inayi ya yi mu kwate po. Sho nda lulilwa Etine oshiwike sha zi ko onda tokola ndi ikuthile oveta ngame mwene, onda menekele megumbo lyaakuluntu ye nonda adha ya lala, onde ya pula ya pe ndje Titus Sam Uupindi noye mu pe ndje pwaana eyongayongo,” Paavo a ti.

Oyali anuwa yayi puundunda mpoka naanamukunda mokugongala kwawo oyali ya nyanyukwa sho omufuthi ngoka a kala ta yonagula pomukunda a kwatwa. Paavo okwali anuwa a kutha ongodhi te mu mangele mopaala, nokwa tameke anuwa temu tsu momeho, ta ti otemu kutha omeho opo kaa yake we.

Konima sho emu tsu okwa yi kopolisi noku yi tseyithila kutya omufuthi ngoka ya kala haya lopotelwa ta piyaganeke iinima momukunda okwe mu mona nokwe mu monitha oshiponga momeho.

Oyendji yomaanamukunda mboka Kundana a popi nayo kombinga yoshinima shika oya ti, Titus Sam Uupindi ngoka okwa kala ta piyaganeke omukunda nuufuthi noyendji mboka yena uundunda womanwino, uuna taya pata ohaya kala yena uumbanda oshoka oya tila yaadhe uundingosho wawo wa tewa ngele kwashi.

Taya hokolola kutya oha teya owala uusiku, ye iha thigimo sha ngele a mono ompito yokuyamo, taya popi kutya pamwe sho a tsipulwa omeho i ta yaka we. Omulumentu nguka omunamimvo 32 okwa lalekwamo nale moshipangelo shaNandjokwe hoka a li a falwa konima yokutsuwa omeho ngaaka. Nakutsuwa momeho ota kuhokololwa a kala a lulila aantu pomukunda nopomudhingoloko ngoka, unene sho ha yaka nokuteya oongeshefa dhaantu.

Okwa li a lulila ooyene yuundingosho wopoSun City, mboka wuli pooha dhopate yopokati kOkankolo nOnayena. Aakalimo yomUuyoka oya ti olundji ngele okwa teya okandunda kontumba oha hadhuka po ta ningi omasiku kee wetike mpoka a gama, nohayi koombinga dhimwe hoka natango ha tsikile noku yaka iinima yaantu.

Nonande a kala e shiwike nawa kaanamukunda kutya oye te eta ombepo yuufuthi, olundji ngele ya teyelwa uundingosho wawo ohaya lopotele opolisi, ashike yamwe ohaya mwena owala. Nakutsa omufuthi nguka momeho gumwe gomwaamboka ya teyelwa uundingosho wawo. Edward Paavo, okwa ti okwa kala ta teyelwa okandingosho ke komulumentu nguka ashike nande okutseyithile opolisi ihayi holoka.

Titus Sama Uupindi oye omuntu omutiyali pandjokonona mOndonga ta tsuwa ommeho omwoluufuthi.
Okwa landula Niiye ngoka a tsipulilwe omeho molwuufuthi wu kenyeneka..

LEAVE A REPLY

Please enter your comment!
Please enter your name here