A dhipagwa sho taya kondjele onyama

0
2222

MARIA NAMUPALA

OKANKOLO – Opolisi moshitopolwa shaShikoto oya manga omulumentu gomimvo 27, ta tamanekelwa edhipago lyomulumentu omukwawo komukunda Onekotale moshikandjo-hogololo Okankolo.

Oshiningwanima shika osha ningwa ongulohi yOlyomakaya megumbo lya Risto Ndapwa Nangolo. Otaku hokololwa kutya omufekelwa Abner Ashoongo a za komukunda Ekuma okwa longitha ombele yokapi, nokwa tsu Johannes Efraim gomimvo inaadhi tseyika a zile komukunda Ongombehupa moshikandjo-hogololo osho tuu shoka.

Omupopiliko gwopolisi mOshikoto Chief inspector Stefan Nuuyi, okwa koleke oshiningwanima shika, ta ti nakusa okwa tsuwa lwiikando oyindji montulo kombinga yokolulyo,mombunda, kepepe lyokolulyo, mepunda nokombinga yimwe yokwaako.

Nuuyi ta ti aalumentu mbaka oya li taya nyenyeta nokukondjela onyama, shoka shafala sigo omolugodhi ndoka lwa hulile meso. Nonande oshiningwanima shika sha ningwa uusiku wokupendukila Osoondaha, nakusa okwe ki itsuwa ongula yOsoondaha kokanona komegumbo moka.
Okanona hoka okali ka tseyithile aashiinda mboka yeya pehala mpoka pwa ningilwa oshiningwanima, noku nothelako opolisi ndjoka yiilepo omudhimba gwa nakusa nokugu fala kokila yomidhimba.

Nuuyi ta ti omufekelwa sho a longo omuyonena ngoka, okwa hadhuka po nopolisi oya kala yi muli mokashoko. Okwa kala keewetike uule thimbo ashike opolisi oye ke shi pondola oku mu kwata po Osoondaha oyo tuu ndjoka, aadhika a holama pomukunda guli lopopepi.

Shika osha ningwa sho opolisi ya li ya gandja etumwalaka moshigwana, naakwashigwana oya longele kumwe nayo opo omufekelwa ngoka a kale a kwatwa po. Opolisi oya pandula oshigwana sho sha longele kumwe nopolisi moku kwatitha po omulumentu ngoka.

Ashoongo okwa holoka mompangu ya mangestrata gwaNdangwa Omaandaha ta pangulilwa edhipago. Okwa holoka komeho ga mangestrata Peter Nangula nomutamaneki Bruna Muterembi. Omufekelwa okwa fatululilwa uuthemba we, no ina pewa ompito yokwiifutilamo. Oshipotha she oshuundulilwa komasiku 15 Aguste, shi gandje ompito kopolisi yi ninge omakonakono, ye omufekelwa a tulemo eindilo lye lyomukalelipo gopaveta.

Aalumentu ayehe oya adhika aaniilonga yomomagumbo, yo oyeli aashinda komukunda hoka kwa ningilwa oshiningwanima.

LEAVE A REPLY

Please enter your comment!
Please enter your name here