Mijeanne naAndeline koMiss Continents 2017

0
49

SABINA ELAGO

WINDHPOEK- First Princess gwaMiss Namibia 2016 Andeline Wieland pamwe na Miss Teen Namibia 2017, Mijeanne Marais otaya ka kalela po Namibia methigathano lyedhina Miss Continents 2017 ndyoka tali ka ningilwa moLas Vegas shaUnited States pehulilo lyomwedhi nguka.
Methigathano ndyoka tali kala ko okuza momasiku 27 sigo 30 ga Juni nuumvo Wieland otaka kuthombinga mwaandyoka hali ithanwa Miss Continents omanga Marais otaka kuthombinga mundyoka lyedhina Miss Teen Continent.

Wieland okwa tameka nale neilongekidho lye molwethigathano ndika nopethimbo ndika ota kongo aahondji yomizalo osho wo aakwashilipaleki mboka taye mu kwatha opo a ka kale oopala nawa methigathano ndyoka. “Omuntu ito vulu okusindana ethigathano ndika ongoye awike, ihe ngame ondina etegameno okulonga nawa ngaashi tandi vulu no tandi tala ihe kutya oshike tashi ningwa po,” osho a popi. 

Okwa ti okukuthombinga kwe methigathano lya Teen omumvo 2012 okwe mu pe ontseyo nowino, onkene okwa tegelela oku ilonga oshindji konima yethigathano lyaMiss Continents.

“Halundji ooFirst Princesses haya mono ompito ngaashi ndjika onkene ondina etegameno oku ka tsakanena naakiintu aape osho wo okumona oowino oompe,” Wieland a ti. 

Okwa ti omathigathano gaakadhona aawanawa oga ningi osho onkalamwneyo ye yesiku kehe okuza tuu nkene a sindanene oshikoloni she shotango methigathano ndyoka omimvo ntano dha piti po, onkene oku kutha ombinga mumiss continent otashi kala oshinima shoka ehole ni ishewe oheshi uvile nawa.

“Onda li ndina uukwatya woshimati omanga inandi tameka okukutha ombinga momathigathano ngaka no ngashingeyi ondi itaala lela kutya ngaka oga pandje ompito opo ndi hambule nawa einekelo mwene lyandje, okupopya komeho gaantu osho wo okuthikama ndu ukilila komeho gongundu onene yaantu mboka taya tala nkene tandi ende tandi popi nosho tuu,” osho a ti.

Wieland okwa ti omathigathano ngaka itaga vulu okuyelekwa naangoka goku modeling, oshoka ngaka ogo uunongo tawu kambadhala okuopaleka kehe shimwe monkalamwenyo yomukuthimbinga. Ogo ishewe ompito ombwaanawa yo kutunga omakwatathano omawanawa, nehala lyokwiilonga okuyakula oshigwana.

“Ohandi lombwelwa aluhe kutya ngame ondina uuwanawa waashi kuyelekwa, onkene onda kalela po omutalelo ngoka,” osho a popi pehulilo lyoonkundathana dhetu.  Omuprincess gwotango moMiss Namibia okwa simanekwa okukalela po Namibia oshoka Lizelle Esterhuizen, Miss Namibia 2016 ota ka adhika iipyakidhila noku gandja oshikoloni kuMiss Namibia 2017.

LEAVE A REPLY

Please enter your comment!
Please enter your name here