Omaudhano oge na mo oshitopolwa oshinene moNDP 5

0
25

Otniel Hembapu

Windhoek- Okuyeleka nooplana dhopashigwana dheputuko dha zi ko, oplana yeputuko lyopashigwana ontintano [NDP 5] ndjoka ya tseyithwa nokutulwa miilonga oshiwike shayi, otayi dhenge omuthindo koshinima shoku yambula po aagundjuka okupitila momaudhano.
Omathaneko ngaka otaga ti aagundjuka oye na okuyambulwa po noku nkondopekwa tashi pitile moopolohalama dha longekidhwa nawa dhomaudhano geputuko.

Pethimbo ndika oshimpungu shomaudhano moshilongo osha pa aantu omayovi 15 000 iilonga. Mokati kaambaka omuna aadhani, aawiliki yuudhano, aanduluki yiilongithwa momaudhano osho wo aagandji yomayakulo ga yooloka koshimpungu shomaudhano. Ihe shoka tashi yemateke ooshika kutya nando epangelo olya longitha oshindji muudhano omimvo 27 dha piti, oshikondo shika oshi li konima natango, na osha gandja ashike iilonga kaantu konyala ye li le po operesenda yimwe yaaniilonga ayehe moshilongo.

Epangelo olya ndhindhilike kutya iilongo yilwe muuyuni otayi longitha omaudhano oku eta po ekwatathano lyopankalathano unene lyaantu mboka ya dhinika, okukutha po oluhepo, okushonopeka elongitho lyiingangamithi niilonga yomuyonena, onkene lyo olya tokola opo li yambule po omuthika gwaagundjuka okupitila moopolohalama dhomaudhano dha faathana naandhoka tadhi longithwa palwe muuyuni. Shika epangelo otali shi longo mokulandula omautho gomontopolwa ontitatu yoNDP5 ndjoka yi na sha nomaudhano: noyi na wo oshipalanyolo tashi ti ‘Okunkondopeka aantu noshigwana okupitila momaudhano.

Kohi yokatopolwa haka 3,3, 5 NDP5 okwa hala okuhwepopeka ompito yaNamibia oku ka kuthombinga momaudhano gopaithano nelalakano opo omaudhano ga kale wo haga eta mo sha momahupilo goshilongo unene tuu moku gandja oompito dhiilonga okuza pooperesenda 0,2% nokuya pooperesenda mbali okuya komumvo 2022.

Oplan ndjika otayi thiminike oshikondo kehe shepangelo opo shi kale tashi gandja omushangwahokololo gwasho kombinga yetulo miilonga lyoopolohalama dheputuko oshikako kehe.

Ofeedbeka ndjika otayi gandjwa oku tala shoka sha adhikwa po miilonga kehe tayi lalakanenwa koNDP 5.
Iinakugwanithwa mbika yokugandja olopota oshikako kehe oya tamake pamwe netulomiilonga lyoNDP 5.
Oplana ndjika otayi kala miilonga okuza momumvo gwiimaliwa 2017/2018 sigo okomumvo 2021/2022.

LEAVE A REPLY

Please enter your comment!
Please enter your name here